Aizawl: Mauchar khaw tuilakna tur, cheng nuai 74.88 senna chu pumping windmill awm loh vangin hman theih a la ni lo. Controller and Auditor General of India report tarlan danin cheng nuai 74.88 senna tur Mauchar Water Supply Scheme siamna tur hi kum 2006 khan sawrkar chuan a remti a. He hna hi departmental a thawh tura tih niin pumping wind mill bun (siam) hna, nuai 9.65 erawh chu Aizawl a awm contractor te thawh tura dah a ni a. Pumping wind mill hi contractor hian a siam bakah hna zawh tawh hnu kum khat thleng enkawl tura tih a nih bakah sum hi a supply hnuah pek tur a ni bawk. Heti chung hian dan leh hrai  bawhchhiain June ni 25,2008 khan contractor hnenah hian nuai 9.61 hi pek lawk (advance) a ni a, a hmanrua (wind mill) erawh chu May 2009 ah Mauchar khua hi thlenpui a ni chauh niin report-ah hian tarlan a ni. CAG report chuan contractor hian department in tui luankhawmna (pump) an siam chu a tha tawklo a, wind mill bunna atan a remlo a ni tiin a thar siamna tur sum nuai 4 chu June 2009 khan department ah hian a dil leh nia sawiin department lam atangin engmah chhanna a awm lo a. Vawi tam tam wind mill hi siam/bun tura hrilh a ni chungin April 2015 thleng khan contractor hian wind mill hi a la bun lo nia sawiin hei vang hian nuai 74.88 senna Mauchar tui lakna chu mipuiin an la chhawr tangkai theilo niin a tarlang.