Edwards hi khaw lian lo tak Kingston, Jamaica-ah piangin a seilian a, a nu leh pa bakah a nau Fabian-a te nen an khawsa ho a ni. Naupang lai hun nuam tak hmang chhovin a thian te nen football te an khel thin a, lehkhachaih te chaihin theihai lawh te chu nuam a ti thei thin hle. 

Mahse a nuna phek leh lam erawh hrehawm tak a ni thung a, Edward-a pa hi chulai tualchhung gang hotupa a ni a, The General tia hriat a ni. Thenawm hnai vai tak taka in kap thawm te chu Edward-a te thil hriat zing tak a ni. "Tlan chhiat leh bihruk reng a ngai a, indona hmuna chen chu thil hrehawm tak a ni. Tunah kum 9 mi fa ka nei tawha ka thil tawn ang tawng ve tur kha chuan ngaihtuah pawh ka ngaihtuah ngam lo," tiin Edward chuan a sawi. 

Kum 13 mi lek a nihin a pa in a boral san vangin Edwards chuan nun hreawm tak a hmang chho a, hei vang hian a thin a chhiat phahin insual a hrat chhauh phah hle a, a dam khawchhuahna tur ngaihtuahin sum hmuhna rem rem a dap chho a, gang ho tih angin drugs zuarh  leh ruk ruk-in hun a hmang chho tan. Insual a hrat em vangin vawi tam police man a tawk a, a nu chu jail atangin a bail chhuak tu ber a ni.  

Nikhat chu kum 17 mi Edwards chuan a nu ruala bazar a kalnaah gym a hmu a, chu hmunah chuan mixed martial arts an zir thin a. A thil hmuh chuan a rilru luah tlatin, a zawm ve ta a, chu hmun a kal hma chuan MMA hi a la hre ngai lo. 

Gang culture nunpuitu a nih angin insual chu a hrat hle reng a, mahse insual hi infiamna chi khat a ni tih reng alo hre ngai lo. Rei lo a kal hnu chuan an coach chuan insual lamah talent tha tak a neih thu Edwards chu a hrilh a, kum 18 a nihin Edwards chuan amateur-ah a debut match khelin submission hmangin a chak nghal. Kum 23 a nihin UFC-ah a inziak lut ve a, fight tum 14 a neihah tum 11 a chak tawh a ni. 

Kum 7 kalta khan pound-for-pound number one Kamaru Usman lakah a tlawm a, vawiin hian welterweight title chuhin Salt Lake City-ah an pahnih hian an inhmachhawn leh dawn a ni. 

A pa thih hnuah a nu leh a unaupa te nen Birmingham lama nun bul tan thar turin an ram Jamaica an chhuahsan a. Khawvel-a kan in an tih ve theih chhun pawh chu an kal san vek a ngai a ni. An in kalsan tak pawh chu in ropui leh nuam tia sawi tur a ni lem lo. Thing in niin room pakhat chiah a awm a, a chung rangva a ni bawk. 

An khawsakna hmun chu hmun nuam a ni hran lo a, a nuam lo mai ni lovin an kiang lawkah in kap thawm a awm renga silai in kap thawm te chu thil nih dan phung pangngai ve reng ang maiin silai ri hriat tur a tam.

Kum 2004, October thla khan a pa chu misual-in an thah sak. Edward-a chuan,"Ka pa khan eng thil ti thin nge a nih ka hria a, thil la thleng tur pawh ka ngaihtuah thiamin ka hria,” a ti. 

A pa boral hnu chuan a pa phuba lak chakin a tuihal a, sual kawng zawh pawh a pawisa meuh lo.   Tun thlengin a pa thih dan hi chiangkuangin a la hre chuang lo. A hriat awmchhun chu pawisa chungchangah nightclub pakhatah kah hlum a ni. He tual thihnaah hian Kingston lama gang te an inrawlh ngeiin a rinawm. Edward-a ngei pawh hian hun harsa leh hlauhawm tak tak chu a tawng ve fo thin.