R Dengṭhuam Indoor Stadium, Mualpuiah vawi khat tisuala set hnihna hloh thei turin point liin Hunthar an hniam hman a, mahse, ropui taka an kir leh hnuah 25-22, 31-29, 25-21-in an chak. Covid-19 hnua nun thar nei Hunthar che ṭha chhunzawmin thawhṭanni zanah set hloh lovin Chhinga Veng Spikers an hneh a, Zothan Autoworks Pro Volleyball League semifinal an lut.

League vawi thum an khelh tawhah Hunthar chak vekin team panga inel zingah hmahruaitu an ni zui zel a, Pro Volleyball chanchina a vawi khat nan Durtlang North an hneh hnuah champion lai Spikers tukdawl lehin an khelh hnuhnun vawi hnihah set thum faiin an chak zawn.

Gagan Kumar chuan point kua paih mah se 27 thawk chhuakin Hunthar tan rin ngamin a khel a, D3 Business Player of the Night lawmman a dawng. A kawppui Laldensanga'n point 14 hmuin vawi thum a tisual a, team tan awmze neiin a inlan.

Champion lai ni chunga knockout round lut pha lova tlak pumpelh turin Chhinga Vengin chak an mamawhna a sang. El tham pangngai takin khel mah se an nghet tawk lo va, hun pawimawhah hriam zo lovin vawi thum an tlawm zawnna a ni a, an hmabak a khirh tawh hle.

Sujith Acharya chuan point 22 hlawhin vawi kua a tisual a, a vawi khat nan Spikers chakpui a tumna a puitlin thei lo va; Ramengmawia'n point 13 hmuin point li a hloh a, mi malin khel chhe lo mah se team leh player mal inelnaah Chhinga Vengin an elpui an pha lo hret zel a ni. 

Set hmasa berah inhnehtawk taka point an inhmuh chhawk hnuah setter Remsangzuala'n hui tlain Huntharin 20-19-in hma an hruai a; hemi hnu hian Densanga'n vawi li vaw tlain an tlang a, Spikers-in point 22 chiah an hmh ve hman.

Set hnihnaah Sujith leh Ramenga'n Chhinga Veng nawr kalin 11-6-in an sang. Set la thei ngei turin an sang fal zui zel a, Ramenga'n ṭha taka a vuak tlak hnuah point hmuh belha tlang thei turin 24-20-in hma an hruai.

Coach Jesse Lalpianpuia'n a tir aṭangin setter pahnih H Lalruatsanga leh C Lalbiakhlua a inluh chawktir zak zak a, point khat hmuh belha set la mai tur an hnih hnuah hun tha vawi thum an bawhpelh zawn a; Gagan-an ṭum thum a vuak tlak zawn hnuah Huntharin 25-24-in hma an hruai let.

Chhinga Vengin dang ve lehin vawi ruk an deuce zawn a, Hunthar sang zawk zelin 29-29 a nih laiin Zomuansanga'n point a hlap chhuak a, Spikers hruai kir leh tumin Sujith chuan vaw mah se lehlamin dang tlain inelna boruak sangah Hunthar an dingchang.

Chhinga Veng hnualin set thumnaah lehlam el turin an khel a nung zo tawh lo. Thlawptu mipui nei ṭha Hunthar player-ten nuam ti leh inringtawk takin an khel ve thung a, 24-16 a nih hnuah Spikers-in vawi nga dang zawn mah se awmzia a nei zo lo va, Gagan chuan hlap thlain team pahnih inkar a ching fel.

Huntharin Durtlang North an hneh ṭuma khel tha ber lawmman dawngtu Lalramnunfela'n point nga hmuin vawi hnih a hloh a, mi dang langsar zawkin 
Zomuansanga'n point riat thawk chhhakin vawi hnih tho a tisual a ni.

An inlan hnuhnun vawi hnihah an khelh hmasak bera che tha tak Chhinga Veng captain Lallianmawia Pachuau chuan team a fuih phur zo lo a, Hunthar hmaah point nga a hmuh zat chiah a hloh. Lalnunpuia'n vawi khat tisualin point kua a hlawh na a, a chim chin a sang pha lo.

Vawi thum an khelh tawhah Spikers an tlawm vek a, la tla lo mah se kawng a zim sawt hle. May 20, zirtawpni zanah league khel zovin Tuichangral nen an insu dawn a, chak ngei ngei an mamawh rualin min dang dinhmunah an innghat tel a ni.

Vawi hnih champion tawh Huntharin rin an hlawh telh telh a, semifinal lut fel tawh chungin ningani zanah league hmawr an bawk dawn a, an elpui kumhlun TNT nen an intawng ang.

D3 Business Player of the Night
- Gagan Kumar (Hunthar)

Amrit Premium Plus Cement Fan of the Night
- Linda Lalruatsangi, Hunthar

Play stats :

HUNTHAR

Gagan Kumar : point hmuh 27, point hloh 9
Laldensanga : point hmuh 14, point hloh 3
Zomuansanga : point hmuh 8, point hloh 2
Lalramnunfela : point hmuh 5, point hloh 2

CHHINGA VENG SPIKERS

Sujith Acharya : point hmuh 22, point hloh 9
Ramengmawia : point hmuh 13, point hloh 4
Lalnunpuia : point hmuh 9, point hloh 1
Lallianmawia Pachuau : point hmuh 5, point hloh 5

May 18, Nilaini zan inkhel tur
8pm : Kanan v Bungkawn (hmeichhia)