Mizo nula Nunu Rualhleng channa ISHQYAPA chu December 1, 2023 (Zirtawpni) khan tlangzarh a ni ta. He web series hi Amazon Mini TV-ah a thlawnin en theih a ni - Bollywood film-a main role pay thei kan Mizo nula chhuanvawr channa hi en ve ngei rawh le. 

He film-ah hian Mizo thahnem tak n inlan a, Mizoram chhung - Aizawl, Lunglei, Thenzawl, Ailawng leh hmun thenkhatah shooting neih a ni bawk. Mizoram bakah hian state hrang hrangah shooting neih a ni bawk a, en man hla tak a ni. 

He film hi JAR Pictures kut chhuak a ni a, budget pawh a tlem chhe lo hle tih a hriat theih. 

Nunu Rualhleng

ISHQYAPA film-a main role meuh chang phak Mizo nula Nunu Rualhleng hi film industry lamah chuan mi thr a la ni a, a debut-a main role a chang thei hi a lawmpuiawm hle. Modelling lamah chuan Mizo zingah tawn hriat ngah leh thleng thui berte zinga mi a ni a, film lamah hming a rawn chher chho ve leh mek a ni. 

Chhinga Veng nula chuan, "Modelling lam hi ka tuina ber chu a ni a, mahse eizawn nana hman dawn chuan acting lam ka thlan ka ring. Mahse tunah chuan ka hma hun tur ka sawi thei rih lo a, ka tikawp ve ve rih ang," tiin a sawi a, Bollywood lam atang pawhin sawmna a dawng zui a nih hmel hle. 

Sam Bahadur-ah Mizo pa

December 1 vek khan Mizo inlanna Bollywood film dang Sam Bahadur pawh tlangzarh a ni. He film-ah hin Mizoram Film Forum (MFF) chairman Lalawmpuia Khiangte a inlan a, sipai lal brigadier lemah a chang a ni. 

He film hi field marshall Sam Manekshaw chanchin behchhana siam niin, Bollywood superstar Vicky Kaushal chu a changtupa a ni. Katrina Kaif pasal Vicky Kaushal leh Dinthar Veng pa Pu Opa ten film an changho tihna a nih chu - Mizo te kan thlen chin a sang zel e. 

An director hi kum 49 mi Meghna Gulzar a ni a, hmeichhe filmmaker tlemte zinga mi a ni. Sam Bahadur hian tlangzarh ni hian Box Office atangin vaibelchhe nga (5) a lalut a ni.