Aizawl: Nimin khan Synod Hospital Durtlang Auditorium-ah International Nurses Day-2018 hman a ni a, Health Minister Lal Thanzara chu khuallian a ni. Kumin International Nurses Day thupui chu ‘Nurses: A voice to lead-Health is a human right’ tih a ni. Khuallian Lal Thanzara chuan nurse-te chu Florence Nightingale anga hna thawk a, a inpek anga inpe thar turin a chah a. Damlo leh anmahni awmpuitu an chhungte chunga tawngkam hman leh biak danin nasa takin damloteah damna leh nat zualna a thlen thei a ni tih hre reng turin kalkhawmte chu a fuih bawk. Health Minister chuan, “Nurse-te chu damlohna, natna, beidawnna leh thihna kara thawk reng in nih avangin rilru lam pawh a nghawng lo thei lo a; chuvangin, a êng zawnga thil thlir thiam a, rilru hrisel put tum hram hram tur a ni,” tiin a chah a ni.