ZALEN May 19, 2026: Mission Shakti hnuaiah District Hub for Empowerment of Women (DHEW) bultumin vawiin khan DC Meeting Hall-ah fate chawm seilen kawnga nu chhuanawm pahnih - Biakchhungi leh Vanlalliani te chu Hnahthial Bawrhsap K. Vanlalruati chuan chawimawina thuziak (citation) leh pawisa fai a hlan.

Chawimawina dawngtu Biakchhungi w/o Hrangliana (L) hi Pangzawl Khawngbawk venga mi niin fa sawm leh pakhat (11) a nei a. A fate pahnih hi boral tawhin a pasalin an boral san hnu hian amahin fa pakua (9) hi a rem rem thawk chungin a chawm puitling vek a. A fate hi tunah chuan a then sawrkar hnaah te lutin a thenin dawrte an siam a, anmahniin an intodelh vek tawh a ni. 

Chawimawina dawngtu Vanlalliani w/o Biakhmingliana (L) hi Tarpho khua a cheng niin a pasalin a boral san hnu hian a theih theih a inhlawhin a fa panga (5) te chu a chawm seilian a. Tunah chuan a fa upa ber hian High School zirtirtu hna thawk mekin thenkhatin Missionary hna an thawk a, an naupang ber hian computer a zir mek bawk a ni. 

Chawimawina hian thuziak (Citation) bakah pawisa fai cheng sang nga (Rs. 5000) a keng tel a ni.