Aizawl: Nimin khan Serchhip DC Conference Hall ah MLA General Election lo awm tura Serchhip District tana Election Commission of India-in Expenditure Observer tura a ruat, Divakar Chakravarti, IRS chuan Serchhip District Election Expenditure Monitoring (EEM) team hrang hrangte meeting a neihpui. Expenditure Observer chuan Candidate tinte sum hman theih zat bithliah chu Rs. 20 Lakh a nih thu sawiin sum hman theihna (legal) expenditure leh dan phalloh zawnga sum hmanna (illegal expenditure) a awm thusawiin, candidate tinte sum hmanral kawng tinreng chu Election Commission of India in dan a siam ang thlapa endika umzui a nih zel tur thu a sawi a. Team hrang hrangte chu an chanvo thawh dan tur inziahna lehkhabu kawl reng tur leh bihngun tura fuihin, team tinte chu inmamawh tawn leh thawk ho vek an ni tih inhre turin a ngen. Harsatna an nei emaw, zawh duh leh hriat duh an neih apiangte inthlahrung hauh lova zawt zel turin a ngen a ni. EEM Teams hrang hrangte a huhova meeting a neihpui zawh hian Observer hian Accounting Team leh Assistant Expenditure Observers te chu a hrangin meeting a neihpui leh a, chumi hnuah EEM Teams hrang hrangte thutna Room leh an inbuatsaihna te a hmunah a tlawh kual leh a ni.