ZALEN December 18, 2024 : Officers' Club Lawngtlai (OCL) te chuan vawiin khan Mi harsa leh Chanhai zawk ten Krismas hlim taka an hman theih nân a sum an thawhkhawm 'Bahhnukte Charity' cheng 1,23,000 chu Central Young Lai Association (CYLA) Hruaitute kutah a mamawhte hnena hlan chhawn turin an hlan.

He hunah hian Officers' Club Lawngtlai President Lalrinsanga (DCSO) chuan 'Bahhnukte Charity' puala sum tlingkhawm chu F. Lalrothanga, President, CYLA kutah OCL aiawhin a hlan a. Kum 2017-a Officers' Club Lawngtlai din a nih atang khan kum tinin 'Bahhnukte Charity' kalpui thin a. Lawngtlaia NGO hrang hrang, Motherless Home leh mipuite tan OCL hi an luangchhuak thin a ni. OCL Member kal chhuakta te pawhin 'Bahhnukte Charity' an ngaihpawimawh thin a, kuminah pawh sum leh pai tha hnem tak an thawh a ni. Lalrinsanga chuan CYLA ten chiang zawk a tanpuingaite an hriat avanga an kut a hlan an nih thu sawiin thahnem ngai taka a mamawhtute hnena sem chhuak turin CYLA hruaitute a ngen nghal bawk.

Central Young Lai Association (CYLA) President F. Lalrothanga chuan Officers' Club Lawngtlai leh CYLA ten thawhhona tha tak an nei thin a, hei hi chhunzawm zel a pawimawh hle a ti a. Lawngtlai District hmasawnna tura Officers' Club Lawngtlai hmalakna hrang hrang fakawm a tih thu tarlangin, thahnem ngai tak a thawk zel turin a ngen.