Oct. 2021-a khawvel player hlu ber ber 10

Admin - Oct 11, 2021

Mbappe a chungnun ber rih

Footballer hlu ber thlan chung changah hian inhnialna tam tak a awm thei awm e. An thiamna piah lamah hian kawng hrang hrangah hlutna te an neih thin vangin a ber hi hriatthiam a har hle thin. 

Transfer boruaka player man an chhiar te hi chu an hlutna an chhut atanga an man zat awma an ngaihin club lamin an chhiar mai thin. World-class player te hlutna phei hi chu chhut thiam mai a har bakah, player dang te aiin an to fal hle thin. Mahse, pawisa hlutna tlak hniam leh hniam loh hian player man hi a hril ve thin hle.

Sport chanchinthar ziaktu ziaktu lar sportskeeda ten October, 2021 chhunga khawvel footballer hlu ber ber 10 a thlan chhuah te hi i pawm zawng an ni ve em?

#10 Frenkie de Jong (Barcelona) | £81 million

Barcelona hian sum lamah harsatna namen lo tak an tawk mek a, mahse an thangthar player te hlutna erawh a sang hlawm hle thung. Pedri, Ansu Fati leh Gavi te hian mit an la hle tawh a, anni ho ai hian Netherlands international Frenkie de Jong hi a hlu leh zual. 2019 khan Ajax atangin £77.5 million bawrin Barcelona hi a zawm a ni. 

Kum 24 mi De Jong hi a kum rualpuiah chuan player tha ber pawl a ni mek a, a dribbling leh mit fing taka a ball a sem kual hian khawvel midfielder tha ber pawl a nih tir mek. De Jong hi Barcelona innghahna pawimawh a ni der tawh. 

#9 Jadon Sancho (Manchester United) | £81 million

Jadon Sancho hi Manchester United-a a luh hnu hian ropuiin la che lo mah se a lo khelh tawh thin dan avangin a hlutna a hniam tak tak thei lo. Sancho hian tun nipui khan Borussia Dortmund atangin £76.5 million-in Manchester United a zawm a. Germany-a a khelh lai khan England international hi rawlthar zinga khawvel player tha ber pawla sawi a ni thin. Club lian hrang hrangin an hel laia Manchester United-in a lalut thei kha inchhuanna tham a tlin.  

England international hian Premier League lamah bul tan tam rih lo hle a, tin khawvel club ropui ber pakhata tana game kua vel lek chhunga chet that tawh loh avang rinawt hian, kum 21 mi Sancho thiamna leh hlutna hi teh ngawtchi pawh a ni rih lo. 

#8 Neymar (Paris Saint-Germain) | £90 million

Paris Saint-Germain-a Neymar-a pawimawhna hi sawi thiam a har hle a, a pawimawh rualin amah vanga club sum sen hi a inphu em tih pawh hi zawhna tling a ni. 

Khawvel player manto ber turin 2017 khan, Neymar hi Paris Saint-Germain-in £200 million in an lei chhuak a nih kha. Kum 29 mi hi tunah khawvel player thaber pawl a ni mek. A mimal thil vang leh inhliam vangin Paris Saint-Germain tan hian inlan loh a nei nual chungin Neymar hi UEFA Champions League, 2020 final Paris Saint-Germain ten an thlenna tura player pawimawh ber ti ila kan sawi sual lo ang. Lionel Messi leh Kylian Mbappe te nen an inkawp ngat hi chu an tawrhhlelhawm ve viau ang. 

#7 Kevin De Bruyne (Manchester City) | £90 million

Khawvel midfielder tha ber tia chhal ngam Kevin De Bruyne hi an club tana innghahna tling khawpa pawimawh a ni. 
A remhriatna leh thiamna vang hian De Bruyne hi world-class player tih loh rual a ni lo. Belgium international hian 2015 khan Manchester City a zawm a, game 269 a khelh tawhah goal 69 a thun tawh bakah assist 107 zet a nei tawh. 

De Bruyne hi PFA Players' Player of the Year-ah tum hnih leh Premier League Player of the Season-ah te thlan ni tawhin, Premier League-ah Manchester City tum 3 a champion pui tawh bawk. 

#6 Romelu Lukaku (Chelsea) | £90 million

Romelu Lukaku hian Manchester United-a a awm laiin a khel tha tawk lo. 2019-ah Inter Milan zawmin, King of Milan tih hminglem pek hial khawpa ropuiin a inlan leh thei. Antonio Conte hnuaiah Belgium international hian world-class footballer a nih zia a lantir chiang hle. 

Tun nipui khan Lukaku hi Chelsea lamah kir lehin £103.5 million zetin an lei chhuak a ni. Kum 28 mi hian a khel tha nghal hle nghe nghe. 

#5 Mohamed Salah (Liverpool) | £90 million

Mohamed Salah hi tunlai khawvel player tha ber ti pawl pawh an awm ngei ang. A khelh dan enin Lionel Messi te nen pawh an danglamna a tam lo hle. 
Kum 29 mi Salah hi world-class player tak tak niin 2017 a Liverpool a zawm hnuah ropuina tam tak a khum tawhin, Champions League leh Premier League a chawipui tawh a ni. Game 212 a inlan tawhah goal 134 thun tawhin assist 50 zet a nei tling tawh a ni. Salah hian a ball pet nat te, a tlan  chakna te leh a chet ranna te hi a hmang tangkaiin defender tana player dan har pawl ber a ni mek. 

#4 Jack Grealish (Manchester City) | £90 million

Jack Grealish-a’n tun nipui a Manchester City a zawm kha mi tam tak mak tih a ni a, mahse City boss Pep Guardiola hian a thiamna hmuh hmaih lovin hun rei tawh tak atang khan a hel ru reng thin tih hriat a tha awm e.

Manchester City hian Aston Villa atangin £106 million bawrin an lei chhuak a, mahse, season liam taa Premier League player tha ber zinga mi manah chuan a to lutuk hran lo. 

Grealish hian talent a nei tha em em a, Guardiola hnuaiah nasa zawkin a peipun thei ngei a rinawm bawk. 

#3 Harry Kane (Tottenham Hotspur) | £108 million

Harry Kane hian tun season-ah Premier League goal a la khung lo hi thil mak tak  a ni. Mi tam tak chuan tun summer hian duh angin a la fit tawk lo niah an ngei,. Spurs striker hian Manchester City lama luh a duh hle a, City lam pawhin lei tumin an hle nasa viau mahse, Tottenham Hotspur lamin an star player hi an chhuah duh lo. 

Kane hi tun lai player goal thun thei ber pakhat niin England international hian Premier League Golden Boot tum thum ngawt a dawng tawh a ni. 

#2 Erling Haaland (Borussia Dortmund) | £135 million

Manchester City lamin Harry Kane an lei tak loh nachhan nia an sawi pakhat chu nipui leh transfer hian Erling Haaland hi lak luh thei an an inbeisei vang niin an sawi. 

Tunlai thangthar zinga footballer tha ber pakhat Haaland hi tunah kum 21 mi chauh ala ni chungin complete striker tia chhal ngam a ni. Finisher ropui Haaland hian game 67 a khelhah Borussia Dortmund tan goal 68 zet thun tawhin assist tum 19 a nei bawk. Haaland-a pa Alf-Inge hi Manchester City tan alo khel tawh thin a, tin Norway international hi Kane-a aiin kum 7 zetin a naupang bawk. 

#1 Kylian Mbappe (PSG) | £144 million

Nipui lehah Haaland-a’n chhuah thut theina chance a ngah ang bawkin Kylian Mbappe pawh hian France hi a la chhuahsan ngeiin a rinawm. Hun rei tak atang tawhin Mbappe hi Real Madrid nen sawi zawm an ni tawh. Kum 22 mi Mbappe hian 2017 khan Spanish club ropui hi a zawm lek lek a, mahse a khelhna thin AS Monaco atangin Paris Saint-Germain ten an lei chhuak ta zawk. Los Blancos hian an duhna ala reh lova Mbappe pawh hian Spain lama input luh chu a hnial lem lo niin a hriat.

France international hian match 182 a khelhah Paris Saint-Germain tan goal 136 thun tawhin assist 66 a nei tawh bawk. 

Share now