Aizawl: Food Security Act hnuaia hamthatna dawng tur te chu October ni 20,2015 hmaa thlang fel vek turin ruahmanna kalpui mek a ni. Food, Civil Supplies & Consumer Affairs Department thawktute hnen atanga Zalen thudawn danin Food Security Act hnuaia hamthatna dawngtu turte thlang tura ruat Committee chu tunlai hian district hrang hrangah training pek mek an ni a, Aizawl bikah chuan kar kalta Ningani atang khan Aizawl East DCSO hnuaia Committee te tan FCS&CA Directorate Conference hall ah training pek an ni a, naktuk Thawhtanni atangin Aizawl West DCSO hnuaia mite tan Khatla YMA Hall-ah training hi chhunzawm veleh a ni ang. Food Security Act a hman tur hian FCS&CA chuan Ration Card a siamthar mek a, Ration Card thar hmanga a dawngtu tur te thlan a ngaih dawn avangin tunlai hian ngawrh takin Card siam hna hi thawh mek a ni. Khua/veng hrang hranga Food Security Act hnuaia tanpuina dawngtu tur thlangtu Selection Committee ah hian bialtu DCSO chu chairman a ni ang a, Vice Chairman ah VCP/LC Chairman, Secretary ah khua/veng chhunga mi hmingtha, Asst.Secretary ah VC/LC Secretary niin member ah VC/LC member bakah mi hmingtha 2 an awm dawn a ni.