Organising Committee chuan October 28-ah LPS Pro Fight vawi 11-na tan a nih tur thu a puang a, kum kal ta aia tam zawk boxer an tel turah a ngai.

Nilainiah an chairman, Lalsawmliana Pachuau pisa, Zarkawtah an thu khawm a, thu thang vel leh Mizoramah boxing inelna a tam loh avangin nikuma tel zat, 281 aia tam an inlan theih a beisei a, tute tan pawh kawng an hawng tih an sawi.

Mizoram chhung leh pawn atangin kum 17 atanga kum 40 inkar a duh apiang, mahni sensoin an tel thei dawn a, September 23 atanga October 19 thlengin LPS Office, Zarkawtah entry form lak chhuaha theh luh theih a ni ang.

October 23-ah boxer hriselna endikin an inbuk ang a, October 26-ah fixture tichhuakin ni hnih hnuah LPS Arena-ah inhnek an tan dawn a ni.

Nikum ang bawkin flyweight (kg 48-52), bantamweight (kg 52-56), lightweight (kg 56-61), welterweight (kg 61-67) leh middleweight (kg 67-74)-ah boxer-ten title an inchuh dawn a. Kum kal ta khan fly-ah boxer 108 telin an tam ber a, an tlemna ber middle-ah 14 an inlan.

Weight tina champion-in kawnghren leh Rs 60,000; pahnihnain Rs 30,000; semifinal-a tlain Rs 10,000 leh quarterfinal-a tlain Rs 5,000 an dawn dawn a. Mi mal chawimawina tel lovin lawmman pawisa fai Rs 6,50,000 sem chhuah a ni ang.

Champion laite duhthlan tur siamsak an ni a, an awmna weight-ah dinhmun tha seed pek ni chungin an khel chho thei a, an duh chuan anmahni cho tur lo nghakin Title Fight-ah chauh an inlan thei bawk a, Title Fight bik hi khawvel huapa professional boxing chhinchhiahna boxrec-ah ziah luh tura ruahman a ni.

November 2023 khan Title Fight-ah Vanlalenkawltira hnehin fly-ah NT Lalbiakkima a champion a, Pro Fight chanchina vawi ruk champion hmasa ber a ni nghal.

Fly title kalsanin bantam-ah Laldinsanga a champion a, kum zawna Best Boxer-a thlan a nih rualin Ather electric scooter a dawng. Light champion HC Lalramfela'n 2015 hnua a vawi khat nan champion kawnghren a hreng ve thung.

Welter-ah Vanlalruatpuia hnehin a vawi khat nan Lalruatzela Hauzel a champion a; middle-ah C Lalhruaitluanga a dingchang a, 2022 khan welter title la tawhin weight hrang pahniha champion thei zingah a tel zui nghal a ni.