ZALEN October 21, 2023 : Vawiin khan BJP Official Candidate Lalrinliana Sailo leh Nagaland Deputy CM Y Patton te chuan Nalzawl Khua tlawhin Public Meeting an nei. Lalrinliana Sailo chuan an thusawi te a a tak a nih theih nan October 30 hian Modi chuan Mamit a rawn tlawh dawn niin a sawi a, Y Patton chuan Lalrinliana Sailo an thlan tlin chuan amah ang Deputy Chief Minister Mamit-in an nei dawn niin a sawi.

Lalrinliana Sailo chuan, "Nalzawl khuaiin, khaw kawng chhia in la nei hi a pawi takzet a ni, a chhiat dan êm êm hi ka rin phakbak a ni, tuna in khaw kawng hi min thlang tling a nih chuan thla 6 chhungin ka tender nghal ang. Hetiang khawpa sawrkarin an lo hnuchhawn che u hi a mak ka ti hle a ni. Bial ka lo enkawl tawhah chuan an khaw kawng ka blacktop vek a ni," a ti.

Rinliana chuan, "BJP ka zawm chhan chu; kan ram, kan hnam, kan sakhua a him nan leh kan ramin hma a lo sawn leh zual zawk nana hma lak ka duh avanga zawm ka ni a. Min thlang tling a nih chuan, Aizawl ah leh Mamit ah Bru House kan sa ang a, chu mi siam tur chuan Central Minister pawhin min thlawp thlap a ni. Tin, Eklavya School kan hawng bawk ang," a ti.

Speaker hlui chuan, "Mamit District ah hian kan thusawite a tak tak a nih theih nan, tun October 30 hian Pu Modi-a Mamit ah a rawn tum dawn, heti khawpa Central-in a duhsak che u hi keini tan hian a lawmawm hle a ni," a ti.

He huna thusawi tu dang Nagaland Dy. CM Y Patton chuan, "BJP hi sawrkarna ah kan tel ngei dawn a, Pu Lalrinliana Sailo pawh hi keimah anga Deputy CM dinhmun chelh thei tur a ni dawn a, Deputy CM bial nih hi thil chakawm tak a ni, kawng chhe tak hi siam that thuai a ni dawn a, Pu Lalrinliana Sailo hi in thlang tling a nih chuan Krismas hmang turin Mamit bialah hian ka lo kal leh ang," a ti.

Y. Patton chuan, "Mamit bial hi bial vannei tak in ni a, Pu Lalrinliana Sailo politics-a palian takin a bial che u hi in vânnei takzet a, hetihlai hian Pu Modi-a chuan Mamit district asprinational district a nih bawk avangin a ngai pawimawh a, BJP candidate hi Pu Modi-a pawhin a rin ngam êm êm a, in thlang tling anih chuan in tan malsawmna tha tak a ni dawn a ni," a ti bawk.

Hmasâwnna hrang hrang awm thei mi retheite thleng phâk ni turin hma an lak tur thu a sawi a, Aspirational District nih chu remchangah la in, hmasawnna tam tak thawh theih a awm a ti a, Mamit Bial hmasâwnna tur chu a duh ber a nih thu a sawi bawk.