Aizawl: Bru-ten an kir huna an thil ngiat belh leh chu tihhlawhtlin theih a ni lo tih official lam chuan an sawi bakah demand thar an pawm tawh dawn lo niin an sawi bawk a. Tripura-a camp chhawmdawlna zawng zawng chu October thla  kar hmasa berah khar vek tum a ni bawk. Monitoring Committee to Coordinate for Implementation of the Agreement meeting hmasa ber chu July 3, 2018 chu Damcherra RD Block conference hall, Tripura-ah neih niin official lam chuan Bru-ho thil phutte chu tihhlawhtlin  a har tur thu an sawi  a ni. Ministry on Home Affairs-a Special Secretary, Rina Mitra hova thutkhawmah hian  Four Corners Agreement an neih zulzuia karleh atanga Bru Tripura camp hrang hranga mite Mizorama hruai let dan tura hmalak tawh dante an thlirho va. Meeting-ah hian Mizoram Bru Displaced People Forum (MBDPF) hruaitute chuan inremna (Four corners agreement) an lo ziah tawh angin Mizorama hruai let hna kalpui chu an thlawp thu an sawi a; amaherawchu, Bru mipui, camp-a awmten central sawrkara an thil phut, inremna an ziah a tel loh, in 500 awmna khua din te, Bru Area Development Council dinte tihhlawhtlin a nih loh avang leh Mizorama hruai kir tura chhungkua enfiah tawhah chhungkaw member kim lote an awm avangin hruaikir (repatriation) chu a hlawhtlin loh an hlauh thute an sawi. Joint Secretary (North East) Ministry of Home Affairs, Satyendra Garg chuan Central, Mizoram, Tripura sawrkar leh MBDPF ten inremna an lo ziah tawh angin Tripura atanga Bru hruai let hna chu thawh a nih tur thu leh demand tharte chu Central sawrkarin a pawm theih tawh loh thu a sawi a, Rs. Nuai 4 fix deposit-a dahte chu saving account-a dah a rem loh thu leh hamthatna pawisa an dawn nghal turte pawh Mizorama an awmna tur hmuna an awm phawt loh chuan pek an nih loh tur thu leh Tripura Bru camp zawng zawngte pawh October kar hmasa berah khar vek tum a nih thu a sawi bawk. Special Secretary (Internal security) Rina Mitra chuan Bru Tripura camp-a chhawmdawlnate chu tihtawp vek a nih tur thu leh Ministry of Home Affairs chuan Tripura camp-a Bru-ten demand dang an neih leh chuan MBDPF emaw, pawl dang emaw pawh inremna siampui turin an biak tawh dawn loh thu leh demand thar nei tawh lo turin a ti bawk. Meeting-ah hian Bru chhungkua, Tripura camp atanga Mizorama lo let tawhten tuna lo let turte hamthatna dawn ang dawn ve an dilna chu central sawrkarin a lo ngaihtuah tur thu sawi lan a ni bawk. Zirtawpnia meeting-ah hian Central aiawhte bakah Mizoram atangin Home Dept. Principal Secretary Lalnunmawia Chuaungo leh Tripura sawrkar aiawhin Principal Secretary, MBDPF aiawhin A.Sawibunga, R.Laldawngliana, Bruno Mesha, Bru Coordination Committee (BCC) aiawh Elvis Chorkhy leh CYMA President Vanlalruata te an tel a ni.