LPS Pro Fight vawi 10-na leh professional a nih hnua a tum hnih nan October-a tan turin ruahmanna siam fel a ni a, a hmun tur erawh a la chiang thei rih lo.

Organising Committee chuan kuminah Falkland venga sak mek, LPS Arena-ah huaihawt a tum a; mahse, tun dinhmunah thawh zawh hman a ni dawn em tih a chian theih loh avangin a hmun tur chiang takin a sawi theih rih lo a ni.

Nikum ang bawkin weight hrang pangaah title inchuh leh tur a ni dawn a. Kum 17 chin chung lam a duh apiang Mizoram leh state dang atang pawhin anmahni insengsovin an tel thei ang.

Kum kal taah Mizoram mai ni lovin Zohnahthlak tute pawh tel phalsak a ni tawh a. Hetih rual hian Pro Fight boruak an lo hriat atangin India ram hmun dang, hmarchhak state mai ni lovin Haryana, Delhi leh state lian zawka boxer-ten tel ve an châk thu an sawi.

Tun tumah an tan kawng hawnsak a ni a, senso an intum vek a ngai thung dawn a ni.

Mizo boxer-te tam zawk an tel theih nan weight then dan thenkhat erawh tihdanglam a ni a; fly-in kg 48-52 huamin bantam-ah kg 52-56, feather awm tawh lovin light-ah kg 56-61, welter-ah kg 61-67 leh middle-in kg 67-74 a huam dawn a ni.

Nikumah fly-ah Laldinsanga (Lunglei), bantam-ah Lalrinngheta (Tuipui), feather-ah Lalrosangzuala (Chaltlang), light-ah Vanlalawmpuia (Khuangthing) leh welter-ah C Lalhruaitluanga (Chawngtlai) an champion.

Pro Fight hnuah Dinsanga’n professional boxing vawi thum khel zuiin a chak vek a, tum khat ve ve an inlanah Rinngheta leh Hruaia an chak bawk a. Awpa erawh Thailand-ah tum hnih Asia title chuha a fehchhuahah tlawm zawn ve thungin, Rosanga a inhnek zui miah lo.

Organising Committee chuan a hmun tur tihchian mai theih ni rih lo mah se boxer-ten inbuatsaihna hun an neih theih nan Pro Fight neih a nih hun tur puanzar tha a ti a. A tir atanga hman theih a nih loh pawhin LPS Arena-ah zan hnih awh turin title fight buatsaih theih erawh a beisei viau a, title chuha inhnek mai bakah Pro Fight champion lo ni tawh, NT Lalbiakkima leh mi dangte tan hmun siamsak tel ni se a duh bawk.

Kum 2009 khan LPS Vision leh Mizoram Boxing Association-in a vawi khat nan hlawhtling takin Pro Fight an huaihawt a, kum 2010 leh 2011-ah chhunzawmin 2014, 2015, 2016 leh 2017-ah kum li neih zawn leh a ni.

Kum 2018 khan Mizoram inthlanpui avangin a hmun turah harsatna a awm a, neih theih a ni ta lo va. Kum 2019 kum tir lamah chhunzawmin hmarchhak state dang atangin boxer sawm an ni a, boruak lian tak hnuaiah a hlawhtling hle.

Covid-19 leng avangin kum 2020 leh 2021-ah buatsaih zui theih a ni lo va. Kum 2022-ah tharthawh leh a nih laiin Mizoram Boxing Association an tel remchang lo ve thung a, a hma zawnga promotional fight ni thin kha professional fight pangngai angin LPS Promotion-in a kalpui a, a vawi hnih nan kuminah huam zau zawka chhunzawm leh a tum a ni.