Mizoramin rel hmanga châk a lak luhna kawngpui, August 28-a tui lianin Hailakandi district, Assam-a mi chu October thla chhungin hman leh theiha siam zawh a ni dawn.

He rel kawng hi Mizoramin buhfai a lak luhna kawng pawimawh tak a nih bakah Churachanpur, Manipur-a phurh luhna kawng a ni bawk.

Killarbak khaw bula Tlawng lianin rel kawng a tihchhiat hi Zirtawpni khan Food, Civil Supplies & Consumers’ Affairs Minister B.Lalchhanzova’n a tlawh a. He kawng hi Indian Railway-in siam that tuma hma an la mekna a ni.

Railways hotute leh hna thawktute chuan minister hnenah hian October thla chhungin hna zawh hman an tum thu an lo hrilh.

Jamira Station bul maia kawng chhia hi Mizoram Chief Minister Lalduhoma pawhin September 3 khan Railway Minister Ashwini Vaishnaw hnenah siam tha thuai turin a lo ngen tawh a. Chhanzova pawh hian a hmuna a awm lai hian PR Kumar, DRM/Lumding chu phone-a biain siam that thuai a nih theih nan tan la sauh sauh turin a chah bawk.

Minister rel kawng chhia a en rual hian Gharmurra-a Synod Mission Compound tlawhin a tul apianga an hman atan Presbyterian Mission School Headmaster HC Laldinmawia hnenah Rs. 10,000 a hlan.