Aizawl: Mega watt 60 pechhuak thei tur Tuirial Hydro Electric Project chu October 2017 chhung hian hnathawh ngaite thawh zawh a, hawn hman beisei a ni. Tuirial HEP hi Zirtawpni kalta khan Aizawl chanchinbumi thenkhatten tlawhin an hnathawhte an en a. Project viltu Deputy General Manager (C) Dr. Pradeep Saikia chuan theihtawpa chakin hna an thawk mek nia sawiin tunah hian civil works chu zawh a ni tawh a, khawl (turbine) pahnih vuah turah pakhat chu vuah zawh ni tawhin pakhat zawk hi vuah leh mek a ni a, zawh thuai an beisei tih a sawi. Dr. Saikia chuan Tuirial lui khuah chu power pek chhuahna atan mai bakah lawngleng hmanga inkalpawhna atan te, sangha khawina leh khualzin mite hiptu atan pawh hman tangkai theih a nih thu a sawi bawk. Tuirial HEP siamna atan vaibelchhe 1400 vel sen a ni a, hun hmasa lamah hna engemaw zat thawh ni mahse harsatna hrang hrang avangin hluihlawn (abandon) a ni hman a, kum 2011 atang khan North Eastern Electric Power Corporation Limited (NEEPCO) chuan thawk chhunzawm lehin he project a civil works hi Patel Engineering Ltd. ten an thawk a, electrical works hi Bharat Heavy Electricals Ltd. ten an thawk thung a ni. Tuirial HEP hi mega watt 60 pechhuak thei tura duan a niin khawl pahnih mega watt 30 ve ve pechhuak thei tur chu bun (install) a ni a, a ram chim chhiat tur (catchment area) hi 1861 sq.km nia chhut a ni. He project atanga power pekchhuak 12% (8 mega watt) hi Mizoram chuan a thlawnin a hmang/chang thei dawn a, a bak 52 mega watt pawh a duh chuan a lei vek thei dawn a ni. Tun dinhmunah Mizoram in power a mamawh san lai ber (peak hour)-ah mega watt 84 vel a ni a, tluang taka Tuirial hi kalpui theih a nih chuan Mizoram mamawh zualpui chu a phuhru thei dawn niin NEEPCO thawktute chuan Press mite an hrilh bawk. Tuirial HEP in power a pekchhuak hi unit khat Rs. 8.44 tur nia chhut a ni. NEEPCO thawktute chuan sawrkar leh tual chhung mite tawiawmna an dawn that avangin an lawm hle tih an sawi a. Project chu kum 50 daih tura ruahman ni mah se kum 50 aia tam a hman theih dawn niin an sawi bawk.