ZALEN, September 10, 2025: Mizoram Volleyball Association (MVA) chuan October thla tir hian inter village tournament a buatsaih leh dawn.

Inelna hi October 1-10, 2025 chhungin R.Dengthuama Hall, Mualpui, Aizawla khelh tur niin MVA chuan tel vek turin village council leh local council-te a sawm.

Khua leh khua, veng leh venga volleyball inelna hi tun hnaiah a kum telin tel an thahnem thin a. A hnuhnung ber, kum 2023-ah kha inelna buatsaih tawha tel an tam ber tum niin team 107 (hmeichhia 27 leh mipa 80) an tel a. Hmeichhia leh mipa team tel kawp thei khua/veng 17 zet an awm bawk.

Hemi hma chiah, kum 2019 khan mipa team 52 leh hmeichhe team 18 an tel tawh bawk a, hei pawh hi an tel tam tum ber pawl niin a hnuhnung berah khan a hma chiah aiin mipa team 28 leh hmeichhia pawh team kua laiin an tam zawk thung.

Inelna hnuhnung berah khan hmeichhiaah Kolasib Diakkawn Village Council an champion-in an vawi thum champion-na a ni a, final-ah Thenzawl East VC chu te 3-1 (25-22, 17-25, 25-22, 25-13)-in an hneh.

Hemi tum hian Best Spiker-ah Lalmuanpuii, Kolasib Diakkawn leh Best Setter-ah Lalrinzuali, Kolasib Diakkawn thlan a ni.

Mipaah Khawhai chu champion lai niin kum 2023 khan final-ah Hunthar Veng Local Council chu 3-1 (12-25, 25-15, 25-13, 25-21)-in an hneh a, a vawi khat nan an champion a, ropui takin an lawm nghe nghe.

Mipaah hian Best Spiker-ah Khawhai thiampuipa, Lalhmunmawia (Mapuia) thlan a ni a. Best Setter-ah H. Lalramdinmawia, Khawhai thlan a ni bawk.

MVA hian Central YMA-in an hnuaia branch-te inelna a buatsaih loh kum zel (kum karthlakin)-ah khua leh khua inelna hi a buatsaih thin a. Kum 2021 khan Covid-19 leng vangin a buatsaih thei lo thung.