Aizawl: Mizoram MLA inthlanpui neih hun chu hriat theih la ni hrih lo mah se Election Commission of India chuan October thla tir hian a puan rin a ni. Zalen thudawn danin Mizoram electoral roll revision neih mek hi September 27, 2018 thleng neih a ni dawn a, hemi hma chuan ECI hian inthlan an puang dawn lova, hemi hnulam hun remchang hmasa ah a puan beisei a ni. Zalen thudawn danin Mizoram inthlanpui hi November thla tawp chawlhkar emaw, December chawlhkar hmasa ber emawa neih beisei a ni. Hetih lai hian electoral roll a Bru te inthunluhna tur form 6, tun hnaia Mamit DC office atanga rukbo chu he chanchin buatsaih lai thleng hi chuan hmuh let a la ni lo a ni. Mizoram MLA inthlanpui lo awm turah hian polling station venhim ngai bik (critical polling station) engzat nge awm dawn hriat a ni rih lo a, Aizawl district-ah chuan 17 a awm dawn nia thudawn a ni a. Heng critical polling station-te hi Manipur ramri hnaihah 16 leh Aizawl Republic venga mite an ni.