Aizawl: Mizoram chhunga district pali Champhai, Aizawl, Kolasib leh Serchhip te chu Open Defication Free (ek in him/pawna inthiar awm lohna)-ah puan a ni tawh a. Mizoram chu India rama ODF state 4-na a nih beisei a ni. Public Health Engineering Department thawktute hnen atanga Zalen thudawn danin PHE department in kum 2012 a baseline survey an neih ah chuan thingtlangah ek in nei thalo chhungkua 30067 an awm a. Hriattheih chinah ek in 9656 sak tawh a niin 20483 sak hmabak a la awm a, hengte hi kumin 2017-2018 chhung hian sak zawh vek tum a ni. Tun dinhmunah Mizoram ah ODF a inpuang district pali Champhai, Aizawl, Kolasib leh Serchhip an awm a, heng district te hi BDO, DC leh state level committee ten an endik hnuah tha tawk nia an hriat chuan ODF certificate hi an pe thin a ni. Swachh Bharat Mission (India faina beihpui thlak) hnuaiah hian Sikkim state chu ek in him leh tha (pawna inthiar awmlohna) state ah puan a ni tawhin a hmasa ber a ni a. Tunah hian Haryana leh Kerela te chu puan leh tum mek an niin Mizoram chu ODF a inpuang hmasa state 4-na ni tura beisei a ni a. Kumin sawrkar kum chhunga inpuang hman ngei turin chak taka hmalak mek a ni tih PHE thawktute chuan Zalen an hrilh bawk. ODF nih hlawkna sawiin PHE thawktute chuan, “ODF-a Mizoram puan a nih chuan mipuite an hrisel sawt dawn a, tlang hrileng hrang hrang kawthalo, santen leh thildang pawh a ziaawm phah ang a. World bank atang pawhin hmasawnna hna thawhna tur sum hmuh theih a beiseiawm a ni,” an ti.