Aizawl: February 28, 2018 khan sorkar senior officer 15 chu a rualin an pension a. Hetah hian Chief Secretary Lalmalsawma pawh a tel ve a ni. Heng officer pension te hi Lalmalsawma, IAS (Chief Secretary), Zothankhuma, IAS (Secretary), V. Lalremthanga, IAS (Secretary), P. Lalchhuanga, IAS (Secretary), Zorammawia, IPS (IGP), C. Laldina, IPS (DIG), Rosiama Vanchhawnga, IFS (PCCF), Lalhmachhuana, MCS (Jt. Secretary), F. Laldingpuia, MCS (Dep. Secretary), R. Rohnuna, MCS (Joint Director), R. Lalfanliana, MES (Secretary), Lalnghinglova Pachuau, MES (E-in-C), Shershing Thapa, MPS (Addl. SP), V. Lalchawimawia, MPS (Dy. Commandant), Lalmalsawma, MF&AS (Secretary) te an ni. Heng officer pension ho te zinga IAS pension turah hian direct a inziak tling chu Lalmalsawma, IAS (Chief Secretary) chauh hi a ni a. Midang hi state service atanga kai chho te an ni. Mizo te zingah hian IAS leh All India Service hrang hranga inziak tling hi an tam tawh lo hle a. Hmanlaia IAS lo chhuahna hmun tia an sawi hial Mizoram hian IAS kan neih hnuhnun ber chu kum 2013 a inziak tling Grace Lalrindiki Pachuau a ni a. IPS-ah chuan direct a inziak tling hi kum 20 chuang hret chhungin pakhat mah an awm tawh lo a ni. Hetiang lama thahnemngai pakhat chuan Mizote All India Service leh central lama hna pawimawh hrang hranga kan luh a pawimawh tawh zia sawiin kan chhehvela hnam tenau deuh nia kan hriat te pawhin central lama dinhmun pawimawh awm ang angah hian an awm fer fur tawh niin a sawi a. Mizote hi kan inhmuhchhuah a hun chho viau tawh a ni. Central YMA hialin central service a Mizote kan luh tam nan agenda ah an nei ta a. Mizoram sorkar pawhin Mizoram Youth Commission kaltlangin IAS min neih tir vat a tum niin a lang bawk a. Mizo zirlaite tan mawhphurhna a sang chho viau a ni. Tunah hian direct a inziak tling IAS officer 10 in India ram hmun hrang hrangah hna an thawk mek a. An zinga pathum hi hmeichhia an ni. IPS direct a inziak tling pawh tlemte chauh an ni tawh.&&&&