ZALEN October 10, 2024 : Vawiin khan Central YMA Committee Room-ah NGOCC leh Mizoram Commercial Vehicle Union (MCVU) te chu Oil man tihniam tura nawrhna kalpui tum a nih chungchangah an inkawm a, NGOCC Chairman Lalhmachhuana, CYMA President chuan he hun hi a kaihruai a, thutlukna an nei thei lo a, MCVU lam hian sawrkar thu an ngaichang rih.

Inkawmnaah hian tunhnaia Sawrkarin Oil man a tihsan chungchang leh a kaihhnawih te, Mizoram Commercial Vehicle Union ( MCVU) in 14.10.2024, Thawhtanni atanga Oil man san leh kawng chhia avanga tlan loh an tum chungchang te sawiho a ni a.

Ni 8.10.2024 (Thawhlehni) a Chief Minister-in NGOCC hruaitute hnenah Oil man tih to chungchang hi Cabinet meeting thurel a nih avangin Cabinet meeting bawkin a ngaihtuah leh a ngaih thu leh Cabinet meeting koh thuai a nih tur thu te, chumi chhung chuan, hriat chian la ni lo, la rel fel theih rih loh, ‘Kept in abeyance’ huangah dah a nih tur thu a lo hrilh chu NGOCC hruaitute chuan MCVU hruaitute hi an sawipui a ni.

MCVU hruaitute chuan ni 12.10.2024 (Inrinni) ral hma-in Sawrkarin MCVU hruaitute hnenah tawngka ngeiin a hmalak tum dan hrilhfiah se an ti a. NGOCC hruaituten Sawrkar leh MCVU hruaitute inkawm dan tur ruahmanna lo siam se an ti bawk.