ZALEN, September 29, 2024 : Mizoram Truck Owners’ Association (MTOA) chuan vawiin khan thuchhuah siamin oil man tihhniam a nih loh chuan buhfai an phur chhunzawm reng thei dawn lo niin an sawi.

Truck neitute chuan tun hnaia diesel man punna chu Rs.8/- dawn niin an sawi a. Hei hian keini motor lian hmanga eizawngte nasa takin a nghawng tih an sawi.

“FCI leh Mizoram sorkara kan buhfai phurh man (agreement) hi oil man tlawm laia siam vek a nih avangin kan dinhmun a khirh ta hle,” an ti.

Oil man tihniam tur hian minister leh chief minister-ah dilna an thlen tawh a, beiseina sang tak nen an thlir mek tih an sawi a, “Kan beisei anga oil man hi tihhniam a nih loh chuan buhfai hi rei kan phur thei tawh dawn lo tih kan puang,” an ti.

Hetiang a lo thlenga ei leh barah harsatna a thleng a nih pawha hrethiam turin Mizoram mipui an ngen nghal.