ZALEN,26 November: Oil palm hi kuthnathawktu tam tak chuan eizawnna bul berah hmangin chhungkaw tam tak chuan tlangram Lo neih bansanin Oil palm huan an siama, chung zingah chuan Mamit district-a Nalzawl khua chu Mizoram a Oil palm tharchhuak tam ber khua niin, Mizoram in kum tina Oil palm a tharchhuah za a 20 (20%) chu Nalzawl khaw tharchhuah niin ZALEN chuan thu a dawng. Hei bakah hian Hmarchhak khaw bila tharchhuak hnem ber nia hriat an ni bawk.

He khua a cheng zatve deuh thaw chu Oil palm a innghat an ni a, huan nei zau deuhte phei chuan thla tin Oil Palm atangin Rs nuai 2 - 7 te an a lut a niin ZALEN chuan thu a dawng a. A la lut tlem pawl pawhin oil palm atangin thla tin Rs 20,000-50,0000 te an la lut a, Oilpalm huan nei ve lo te pawh nitin inhlawhfa te pawhin Oil palm huanah hian an thawh sen loh inhlawhna kum tluanin an hmu niin thudawnna chuan a sawi. 

Hetiang khawpa Oil palm a hma la nasa khua an nih avang leh, Oilpalm chu an khaw mipui zawng zawng deuh thaw innghahna a nih avangte, Mizoram mai ni lo North East-ah pawh a khaw bila Oil palm tharchhuak hnem ber an nih avangin Pu Rinchungnunga VCP Nalzawl chuan an khua chu Oilpalm Village a nih thu a sawi a ni.

Mizoram ah hian sorkar hmalakna in kum 2005 vel atangin Oil palm chin tan ani a, a tirah Company pathum Godrej Agrovet Ltd, Ruchi Soya leh 3F te'n district hrang hrangah hma an la a, Zoram hmun tam takah heng Company te hian Farmer te hlawhtlinpui lo mahse, Godrej Agrovet Ltd te hmalakna Kolasib leh Mamit district a farmer te chuan vawiin thlengin Oil palm hi hlawhtling takin an kalpui a, Heng district pahnih a Oil palm tharchhuah te chu Bukvannei khua a Godrej Agrovet Ltd te Oilpalm Mill ah hralin, Company te hian Oil palm hriak pawh kum tin Metric Tonne tam tak Mizoram pawnah an thawnchhuak reng a ni.