ZALEN September 20, 2024 : Mizoram Oil Tanker Drivers' Association (MOTDA) leh Petroleum Entrepreneurs' and Transporters' Union of Mizoram (PETUM) chuan vawiin khan National Highway 306, Kawnpui leh Sairang inkar kawngpui siam that mek chu an enfiah a, an duh thu sam lo mah se, mipuite mamawhna avangin Tuialhthei phur (Oil tanker) tlan thei leh ngam te chu tlan an phalsak.

MOTDA leh PETUM te chuan Thawhlehni khan thuchhuah siamin Vairengte to Sairang kawng chu Oil tanker tan tlan ngamna tur a nih hma chuan tlan an tum loh thu thuchhuah an siam a, mahse, mipui te harsatna ngaihtuahin vawiin khan thuchhuah an siam.

MOTDA leh PETUM te chuan thuchhuah intawm siamin, "National Highway 306 Kawnpui leh Sairang inkar kawngpui siam that mek chu, kawng khuar zualpui laite hnawh that ni tawh mah se, Tuialhtheiphur Lirthei (Oil Tanker) tlan nan chuan duhthu a la sam lo hle. Kawng siam mek hian duhthu sam lo hle mah se, Tuialhthei-ah Mizoram-in harsatna a tawh nasat tawh em avang leh Mipui mamawh a rang thei ang bera phuhruk a ngaih tawh si avangin Tuialhtheiphur (Oil Tanker) tlan thei leh a tlan ngamte chu tlan tawh mai ni se an ti a, Kawngpui siam mek a hmachhawp la awm mekte pawh hi tha tak leh rang taka thawh chhunzawm zel a nih theih nan Sawrkar chuan hma a lak chhunzawm zel kan beisei a ni," an ti.