Aizawl: Geology & Mineral Resources Department (G&MRD) atanga Zalen -in thu a dawn danin tunah hian Mizoram chhunga tuialhthei zawn hna chu chawlhsan rih a ni a, hmalakna erawh a kal mek zel. G&MR Director Lalhmachhuana chuan tuialhthei hmuhchhuah tawh chungchanga Zalen palai zawhna chhangin ONGC in Meidum-a tuialhthei an hmuh tawh chu company in an buaipui chhunzawm rih lo niin a sawi a, an thawh chak nan hmalak zel anih thu a sawi bawk. Maubuang leh Keifanga tuialhthei hna zawn chhunzawm anih loh chhan sawiin, "Company hi chuan tuialhthei tam tak laihchhuah an duh avangin an duh khawp an hmuh loh hi chuan hlawhchhamah an inngai zel mai," a ti a. Maubuang leh Keifang bulah pawh hian company chuan an duhkhawp an hmu lo niin Zalen palai a hrilh bawk. Lalhmachhuana chuan an hmalak zel dan tur sawiin, "Company hi chuan anmahni kalphung te te an nei a, tunah hian anni lam pawhin hma lak zel an tum a, thawk chak tur te in kan ti ve reng bawk," a ti a. An hnathawh laiah hun tiam an pelh dawn chuan a pawhsei sak thei tu chu central sawrkar niin a sawi bawk. Company-in an kalphung thlak an tum thu pawh sawiin, "Leilung chan-chin an zir danah nasa zawka beih an tum a, ONGC hian khawl phur thlawhna hmangin a rang lamin Mizoram hmar lam survey an tum a, phalna te pawh buaipui mek a ni, " a ti. G&MRD Director chuan tunah hian ONGC chuan Mamit bul Pathian tlang bawr velah tuialhthei zawnga lei verh an tum thu sawiin chumi atan chuan Suarhliap khuaah public meeting neih a nih tawh thu a sawi a.  Mizoram chhunga an duh na hmun hmuna lei an rawn verh theih loh thu sawiin, "A bul hnai khaw mipui te nen public meeting an neih a tul a, dodalna (objection) a awmloh chuan a theih chauh thin." a ti. Tunah Oil India Limited (OIL) in hmalakna zel tur lehkha an rawn thawn dawn niin a sawi bawk. Tuialhthei zawngtute atang hian Mizoram sorkar chuan royalty (leilung chhiah) a hmu nual tawh a, figure neih thar ber kum 2015 chhunga Petroleum Exploration Licence Fee bika hmuh zat chu nuai 318 chuang anih thu G&MRD Director chuan Zalen palai a hrilh bawk.