ZALEN June 7, 2026 : Mizoram Movement for Old Pension Scheme (MIMOPS) chuan naktuk June 8, 2026 hian a huhoa chawlh lak ‘mass casual leave’ an tum.

Central sawrkarin kum 2004-ah New Pension System (NPS) hmang tanin tum eng emaw zat upgrade a ni tawh a, NPS aiah Unified Pension System (UPS) a hmang leh tawh bawk a. Mizoramah erawh kum 2010 atangin NPS thlakna emaw, upgrade pakhatmah a la awm lo va, central sawrkar hnuaia thawk leh Mizoram sawrkar hnuaia thawkte an inthlau tawh hle a ni tih MIMOPS chuan an sawi.

MIMOPS hi December 5, 2022-ah din niin, NPS titawpa Old Pension Scheme (OPS)-a let leh tura hma latu a ni tih an tar lang.

MIMOPS thuchhuah chuan an ngenna avangin sawrkarin October 27, 2023 khan NPS Study Committee a din a. committee chuan sawrkarah official recommendation a thehluh atanga kum khat a liam hnuah pawh sawrkarah thutlukna mumal tak emaw, kal zel dan tur emaw siam a la ni lo a. Mizoram NPS chhe tak leh innghahna tlak loh hian sawrkar hnathawk chhungkaw tam tak, kohhran leh khawtlang thlengin nghawng nasa tak a nei mek a, Study Committee recommendation pawh Finance Department-ah a awm tawh tih an sawi.