ZALEN May 21, 2026: Mizoram Movement for Old Pension Scheme (MIMOPS) Office Bearers & Advisers Meeting 20/05/2026 a neih chuan an thil dil-ah hmasawnna lawmawm lam sawrkar atangin engmah hriat an la neih loh avangin sawrkar auh eih nan hreh tak chungin June 8, 2026 (Monday) hian Mizoram Sawrkar hnuaia NPS subscriber zawng zawng ten Mass Casual Leave lak ni se tih a rel. 

MIMOPS chuan, "Memberte kan tanrual a ngai takzet a, 100% thlawpna hmuh ngei kan beisei takzet a ni. Tun huna member te full support-na kan hmuh loh palh chuan hma lak zawm zel a huphurhawm phah vek dawn a ni tih hria in hemi ni June 8, 2026 hian Mass casual leave i la vek ang u," a ti.

MIMOPS chuan an Mass Casual Leave lak an tum chhan hrang hrang hriattirna an tihchhuah hian an tarlang a. Sawrkar hian Central Sawrkar ngaichang inti siin Central sawrkarin nikum April 1 atanga UPS a hman tir tawh a, chu tal pawh min offer phal/duh chuang lo a, Chutih laiin Study Committee pawh din lohna state - Maharashtra, Assam,Tripura leh Manipur sawrkarte chuan UPS an offer vek tawh zawk bawk a ni, an ti.