2036 Olympic Games thlen tumin India a intintuah mek a, hemi atan hian Ahmedabad khawpuiah infiamna hmun lian tak tak panga din a ni dawn.

Indian leh Gujarat sorkar chuan Olympic thlen theihna tur football khelmual bakah infiamna dang khelhna tur hmun dang pali din tumin inremna an siam tawh.

Hmun dang palite zinga pahnih hi indoor arena a ni dawn a, a dang pahnih hi tennis stadium leh aquatic centre (tui hleuhna hmun) a ni thung ang.

Khelmual thar din turte hi tuna khawvela cricket stadium lian ber ni mek, Narendra Modi Stadium dinna, Sardar Vallabhbhai Patel Sports Enclave-ah a ni dawn a. Sabarmati tuipui kama infiamna hmun awm mek hi zauh tumna rilru nen heng ruahmanna thar hi siam a ni.

Times of India chanchinbuin a tar lan dan chuan Indian leh Gujarat sorkar chuan inremna siam tawhin Ahmedabad Urban Development Authority (Auda) hnenah pawh heng hmun satu tur zawnna chhuah turin tih a ni tawh.

Sardar Vallabhbhai Patel Sports Enclave-a Olympic Games thlen theihna tur khelmual siam turah hian mihring 50,000 an thu thei dawn a. Indoor arena pahnihah mi 18,000 leh 10,000 an thu thei ang a, aquatics centre-ah mi 12,000 leh tennis centre-ah mi 10,000 an thu thei bawk ang.

October thla khan Prime Minister Narendra Modi-a chuan India-in khawvela infiamna kutpui lian ber, Summer Olympics chu 2036-a thleng tur leh 2030 Youth Olympics thleng turin dilna a thehlut ve dawn tih a lo puang tawh.

Modi-a hian Mumbai khawpuia 141st International Olympic Committee Session-ah he thu hi a puang a. Hetih lai hian International Olympic Committee (IOC) chuan kum 2026 emaw, 2027-ah emaw chauh a thlengtu tur hi a puang dawn.

Poland pawhin 2036 Olympic Games thlen hi a tum a. Mexico, Turkey, Egypt leh China hmingte pawh thlen tum zingah sawi rik a ni a. Hengho zing atanga India hi thlan chhuah a nih chuan Olympic Games a thlen vawi khatna tur a ni ang.