ZALEN, Jan. 20, 2025: India-in Olympic Games 2036 thlen a tum a, a tam thei ang Mizo tel ngei se a duhzia lantir nan Lalremsiami a insengso a, Mizoram hockey-in hma a sawn theih nan stick 200 leh ball 120 a pe.

Ningani khan Hockey Mizoramin an office, Tuikhuahtlang, Aizawlah inkhawm buatsaihin an hnuaia district association 10 hnenah Siami’n hockey stick 20 theuh leh ball 12 theuh a hlan a, Mizorama district 11 atangin Khawzawlah hockey association din a ni ve lo a ni.

India senior team tan vawi 156 a khelh atanga goal 41 thun tawh Kolasib nula chuan, “Eng tham ni lo mah se hockey-in hma a sawn theih ka beisei a, 2036 Olympics thlir chungin hetiang hian ka ti ve a ni,” a ti.

A khelkawm sem hi Flush company-in ama puala bikin an siamsak a, a hming leh a jersey hak thin number 20 an chhu kai vek a. A tha ber chi ni mah se tunlai hi a man an tihtlawm lai a nih avangin pakhat Rs 3,500-in a lei theih a, ball pakhat Rs 500 man a ni bawk.

Siami thilpek hlut zawng hi Rs nuai 7.6 vel niin, “Ka thil tawn atangin hockey-ah Mizoten hun tha kan nei hle a, khelmual kan mamawh a. Vaiho khelh tur chauha kan ngaih thin kha Mizoten kan thei ve tih ka hre chiang a, thil awlsam erawh a ni lo.

“A theih hram chuan 2036 Olympics-ah hruaitute nen duhthusam kan neih angin Mizo panga tal tel ve thei ila. Inbuatsaihna erawh a hautak a, kum 10 atanga 15 vel tal a ngai a, tun atanga tih tak zeta tih a ngai a ni,” a ti.

2020 Tokyo Olympics-ah India hmeichhe hockey team tan Siami’n a khel a, palina niin medal an la phak lo chiah a. Mizoram tan eng emaw tal sulhnu neih theih a duh hle a, Uttarakhand-a neih mek National Games-ah tel ngei tumin rilru a siam hman.

Mahse, Hockey India chuan tun hnaiah FIH Pro League khel tur player 24 koin a tel a, Zirtawpniah national camp zawm turin Bhubaneswar, Odisha a pan a ngai a, National Games-ah a tel thei dawn lo.

January 26 khan Hockey India buatsaih Women’s League vawi khatna khelh zawh a ni a, Rarh Bengal Tigers tan khelin thla khat pawh tling lo chhungin Rs nuai 25 a hlawh a, a sum hmuh atangin Mizoram hockey tan hma a la a. Ani bakah hian Bengal Tigers team-ah Mizo pahnih telin, Marina Lalramnghaki’n Rs nuai 10 leh Lalrinpuii Pachuau chuan Rs nuai 2 an la lut a ni.

Reilo te a chawlh chhungin Siami’n Thawhlehni khan Muallungthu hockey khelmual a tlawh a, sorkar hma laknain naupangin thla hnih chhung hockey khelh an lo zir tawh a, a remchan angin anmahni tihphur nan a zirtir ve nghal.

Siami chuan, “Mizoramah phul phah chunga inkhelh theihna hockey khelmual pathum chiah a awm a, Muallungthu hi a awmna hmun a thain duhthusam a ni. Ball an khawih danah thla hnih chhungin naupangin hma an sawn chak ka ti hle a, an tuizia leh nuam an tihzia ka hmuhin phurna min pe,” a ti.

“An phul phah pawh a tha hle a; mahse, tui pekna a awm lo. Tui pe lova inkhelh nan an hman an hman chuan a chhe vat dawn a, tun aia thaa enkawl theih ni se ka ti hle,” a ti.

Inkhawm kaihruaitu, Hockey Mizoram Senior Vice President Lalhmuchhuaka chuan, “Kan chhuan em em Siami hnen atangin thil lawmawm em em kan dawng a. Ani ang hi kan nei leh ang em tih pawh ngaihtuah tham a ni,” a ti.

Muallungthu khelmual phul phah enkawl that tul a tihzia sawiin, “Tui a awm a, a pekna tur khawl pawh a awm a, transformer a awm loh avangin electric power lak luh theih a ni lo. Vawi duai lo sorkarah kan thlen tawh a, min la tihsak thei lo. Harsa a nih kan ring lo a, chuti a nih loh chuan a chhe mai dawn a ni,” a ti.

Tar lan dan chuan Khelo India Scheme atanga sum hmuh Rs. vaibelchhe 5.5 hmangin Muallungthu hockey khelmual siam a ni a, August 28, 2020 khan khatih laia Sports Minister Robert Romawia Royte-in phul lem phahna tur lung a phum a ni.