ZALEN, May 08, 2025: Mizoram chhung leh pawna badminton zirna hmun hrang hrangah Mizo naupang sang chuangin a khelh an zir mek a, sposts minister pawhin Olympic Games-a lan theihna hnai nia ngaiin a phurpui hle.

Mizoram Badminton Association (MBA)-in a tar lan danin Mizoram chhunga badminton zirna hmun 26 awm mekah zirlai 1,074 an awm mek.

Mizoram chhunga zirna in tam zawk, 24 chu TATA Trusts, NEIDA, Pulela Gopichand Badminton Academy (PGBA), Mizoram State Sports Council (MSSC) leh MBA thawhhona hnuaia hmun hrang hrangah grassroot centre din a ni a, hengah hian naupang 1,047 an inziak lut mek.

Heng bakah hian Kolasib leh Champhaiah elite centre din a ni bawk a, badminton training lai mi 27 an awm a. Regional Competitive Training Centre (RCTC), Zuangtuiah mi 20 an awm mek bawk.

Mizoram chhunga badminton khelh zira inziak lutte bakah hian India ram pum huapa zirna in tha, PGBA, Hyderabad, Telengana-ah mi pakua an awm mek bawk a, heng zirlaite hi TATA Trusts-in an sponsor a ni nghe nghe.

Ningani khan TATA Trusts, NEIDA, PGBA, MSSC leh MBA thawhhonaa din, RCTC leh MBC Grassroot Centre hi Sports Minister Lalnghinglova Hmar-in a hawng a. Badminton-ah India a san avangin India rama lang phak nih chu khawvel a lang phak nih thu a sawi.

“Kum 2036-a India-in Olympics thlen a tumah pawh Mizoram infiammite an tel ve ngei theih nana hma lak tan a ni a, Mizoram atanga badminton player-te that dan enin Olympic-a lan theih a hnai riau niin a hriat,” a ti.

Badminton hi Mizorama infiamna lar chak tak ni mekin Mizo naupangte pawhin ram pum huap pawha hlawhtlinna lian tak tak tun hnaiah an chang nasa hle a ni.