ZALEN January 19, 2026: Village Council leh Municipal Bodies atanga thuneihna insemzai te, hlemhletna leh thil dik lo / fel lo awm lova rorelna dik ram leh mipui tana kalpui a nih theih nana ruat Ombudsman C. Lalthanmawia chuan Ombudsman (Independent Local Body) State of Mizoram chu a nih tur angin kalpui a la ni lo tih a sawi.

C Lalthanmawia IPS (retd.) chuan vawiin khan thuthar lakhawmtute kawmin Ombudsman State of Mizoram hnuaiah Village Council leh Local Council te rorel dan leh kalphung leh an hmalak dana sawiselna leh lungawilohna te thlenna tur leh zualkona a nih thu sawiin, a dintirh kum 2013 atanga vawiin thlengin zualko 76 an awm tawh tih a sawi.

Ombudsman state of Mizoram C. Lalthanmawia chuan a hnuaiah hian Village council leh Local Council inrelbawlna a lungawilohna lut tawh zingah political party anga zualkona a lut deuh ber niin a sawi a, criminal case anga kalpui chi lut erawh a la awmlo tih sawiin, Ombudsman hian a hnena complaint te chu chhui fiah nan leh chin fel nan court of civil procedure, 1908 (Central act V of 1908) hnuaiah Civil court power pek a ni a ti a, zualko tawh te chu Village council hnuaia inrelbawlna na anih deuh ber thu a sawi bawk.

Ombudsman (Independent local Body) hi mipui ten khawtlang roreltute - Local Council/ Village Council te rorel dan leh kalphung leh an hmalak dana sawiselna/lungawilohna te thlena an zualko theihna tura Mizoram sawrkarin Act & Rules mumal tak siam a din a ni.