ZALEN August 27, 2025 : District Level Nasha Mukt Bharat Abhiyaan hnuaia ruihhlo do beihpui peng khat atan, Lunglei DC Office chuan vawiin khan hlawhtling takin "Ni Khat Atan Bawrhsap (Be Deputy Commissioner for a Day)" tih hun an buatsaih a, Bawrhsap hna thawh dan a taka an hriatna tur leh mawhphurhna pawimawh la ngam tura fuih phurtu atan Lunglei khawpui chhunga zirlai naupang paruk chu Bawrhsap ṭhutthleng luahtir an ni.

"Breaking the Chains: Prevention, Treatment, and Recovery for All" (Ruihhlo khaidiat chhut chah: mi tin tana invenna, enkawlna leh tihdamna) tih thupui hmanga District Bawrhsap Navneet Mann kaihhruaia hma lakna hi an hma huna hruaitu dinhmun luah tura zirlaite cho phurtu atan leh ruihhlo tel lova an tum hlen chhuak tura tum ruhna petu atana ruahman a ni a. Lunglei khawpui chhunga zirna kawnga ti ṭha leh entawn tlak zirlai paruk – Joseph R. Vanlalpeka (Govt High School, Lunglei), C. Lalngaihzuali & R. Lalhmingmuanpuia (Sacred Heart HSS), Judy C. Lalenkawli & K. Zomuanpuia (Baptist HSS) leh Gracy Lalchhanchhuahi (Govt HSS, Lunglei) te chu hemi atan hian thlan an ni.

Zing dar 9-ah Bawrhsap lirthei hmangin zirlai thlan chhuah 6 te hian Bawrhsap pisa thlengin, Bawrhsap hna thawh dan hrang hrang hrilhfiah an ni a. Chumi hnuah Bawrhsap Pisaa pindan hrang hrang fang kualin, thawktute nen an inkawm a. DC Conference Hall-ah department hrang hrang 12 - Lunglei Municipal Council (LMC), District Rural Development Office (DRDO), Supply, Revenue, Transport, Education, Health & Family Welfare, Public Health Engineering (PHE), Public Works Department (PWD), Power & Electricity (P&E), Urban Development & Poverty Alleviation (UD&PA) leh Police te'n an hna thawh dan an report chu ngaithlain, inkawm hona hun an hmang bawk.

Hemi hnu hian DC dawrtu mipuite mamawh leh harsatnate an ngaithla a. Bawrhsap hna thawh pindanah thu thar theh darhtute nen inkawm bawkin, hemi hunah hian Bawrhsap ṭhutthlenga ṭhuin, Lunglei District hmasawnna tur hrang hrang - hmasawnna ruhrel siam, ruihhlo do, chhiat rupna laka inven, zirna leh infiamna tihhmasawn kawnga an ngaih dan thu thar theh darhtute'n an zawh chu an chhang a. DCSO Office hmuna Multi Level Car Parking sakna tur hmun hma buatsaih mek leh Civil Hospital Lungleia Health ATM chu a hmunah tlawhin, an enfiah bawk.

Zirlai-Bawrhsapte hian Bawrhsap Navneet Mann hova thingtlang zirlaite tana lehkhabu khawn khawm runpui, "Book Nest Initiative" kalpui tur chungchanga DC Conference Hall-a ṭhut khawm chu a takin an chhim a. Hemi hnu hian "Ni Khat Atan Bawrhsap" hun hman aṭanga an thil zir chhuah leh tawn hriatte inhrilh tawnna hun buatsaih niin, Bawrhsap Pi Navneet Mann chuan Zirlai-Bawrhsapte hnenah hian thuziak (certificate) a hlan a ni.

"Ni Khat Atan Bawrhsap" tih hi zirlaite chuan an hlawkpui thu leh thil tam tak an hriat belh thu sawiin, chhunzawm zel atan ṭha an tih thu an sawi a. Lunglei Bawrhsap pawhin kalpui chhunzawm zel tura ruahmanna siamin, Lunglei District chhunga zirlai tam zawkin heti ang hun remchang hi an chan theih nan SDO (Civil) leh BDO te pawhin sub-division leh block level-ah lo kalpui turin ruahman a ni.