One in Christ lo pian chhuah dan sawi dawn chuan eng nge maw chen a ṭobul han sawi ve hlek a ngai ṭhin a, thui em em si lo a han tarlan ka'n tum ang e. 

Ka pa a boral
Tleirawl chhuah chhoh pawh a thuawih leh fel ti a sawi ka ni ve ṭhin a, mahse kum 2004 a ka pa thihna chuan min nghawng na hle a, ka pa mai piahlam ka ṭhian nih thiam em em ka chan ta mai chu hriatthiam har ka ti a, Pathian lakah ka nun chu a vui nasa hle a ni.

Ka zirlai pawh zir ṭha hleithei lovin ka rilru a buai a, tichuan Lunglei lamah ka ni te bula awm turin ka phei ta ngawt mai a ni. Tichuan, ka nun ruak tak hnawhkhah nan tiin sual kawng ka zawh chho ta a, hlim na tak tak ka hmu lo a, ka nun erawh a buai chho tulh tulh thung.

Tawngtai saktu
Kum 2005 kum tawp lam a ni a, chawlhni chawhnuah chuan ka ṭhian pahnih nen Lunglei Sobji bazar pen thlakna bulah hian kan ṭhu a, kan titi nasa mai a. Chutihlai chuan nu pathum inkhawm bang hi kan zawnah an rawn kal a, an zinga pakhat chuan min kal pel hlei thei lo. 

A rawn back leh ṭhin a, tichuan kan lam pan chuan a rawn chho ta a, "Tlangval, ṭawngṭai sak i ngai," a rawn ti ta mai a. Ka ṭhiante pahnih chu an tlan sawn nghal a, kei erawh lo hamhaih bawk nen ka tlan chhe hman lo a, nutling pathum chuan min chelh bet a, khawlaiah chuan chu nu chuan min ṭawngṭai sak ta a ni. 

Ka zak lutuk chu ka mit pawh ka chhing ngam lo. A ṭawngṭai zawh chuan, "Tlangval, duhlo mahla, Pathian rawng hi i la bawl dawn tho tho," tiin min hrilh ta a. Mak tih ai mah chuan nuihzat lamah a kal a, ka ngai thu tak tehchiam lo.

Ṭum khat chu nikhawhre lovin ka tlu a, ka chhungte an lo buai hman viau a ni awm e. Damdawiin lam pan pui nghal ka ni a, harh chhuak lo mahila chu hun chhung chuan mang lamah ti tawh mai ang, Pathianin nasa takin mi pawl ta a ni. Ka harh chhuah hnu chuan mak ka ti hle a, ka ngaihtuahna a kal thui hle mai.

Damdawiin ka chhuahsan hnu hian ka nun paw'n Pathianah tuihalna tak tak a nei chho ṭan a, Kohhran lama ṭhalai rawngbawlnaahte ka inhmang chho ve ṭan. Mahse setana hi a thikthu a chhe khawp a, ka nun hlui hmangin min bei a, mahni insitna ka tlu leh ṭhin a, kum 2006 aṭanga 2010 chho hi chu tluk leh din ka fawm hi a ni deuh ber mai.
Kum 2010 kum tawp lam hian damdawiina admit ngai khawpin ka awm leh a, ka sual leh a nih ber zawk chu. Karkhat aia tam chu mahni pawha chaw ei thei lo, hrai chawp ngaiin ka awm hial a ni. 

OiC a piang ta
Kum 2011 a rawn inherchhuak a, Pathian khawingaihna nasa tak kum tir lamah ka chang leh ta a, ka nunhluiah kir ka duh tawh lo. Mihring mihrinna zawna mi chak tak ka ni ve a, ka nunhlui hian min hneh leh ang tih ka hlau si a, Pathian hnenah rawngbawlna ka dil ṭhin. 

Missionary hna te chuan ka rilru a luah nasa hle a, ṭawngṭaiin ka dil a, nih pawh ka tum ruh hle, mahse ka dilna hi a hlawhtling thei lo reng reng.
Higher kan kal lai leh College kan kal laite khan zai lamah ka tui ve a, eng eng emaw intihsiaknaah pawh lawmman dawng pha chinah te ka tel ve ṭhin a, tin hla han phuah leh sap hla lehlinte hi ka tui ve hle. 

Ṭum khat chu ka rilruah hla hi a rawn lang nawlh mai a, tichuan ka han ziak chhuak ta a, Pathian fakna hla ka phuah hmasak ber ‘Isua ka nei ta’ tih chu a lo chhuak ta a ni. Phurna mak tak mai chuan min man chho zel a, fakna hla sak châkna chuan ka khat ta a ni. Hetih hunlai hian Christ King Higher Secondary School-ah ka thawk a, ka sikul naupang zai lama talent nei ṭha zualte sawmin, October 22, 2011 khan One in Christ chu kan din ta rawih mai a ni.

‘Isua ka nei ta’
Kan hla hmasa ber 'Isua ka nei ta' tih chu kum 2012 kum tirah kan ti chhuak ve ta a, engkim mai kha kan vawikhat hmachhawnna vek a la nih avangin kan zei lo hle a, a nuihzatthlak duh ang reng khawp mai.

Kum 2014 khan One in Christ rawngbawlna hi ka missionary-na hmun tur a ni tih ka hrethiam ve chauh a, he group-ah hian Pathianin mi hrang hrang a rawn hruai lut ve a, OiC rawngbawlna kaltlanga Pathianin mi chhenfakawm tak tak a hrual chhoh tak hi an awm nawk a ni.

‘Ka lawm e Lalpa’
Kum 2016, August 13 khan kan Album hmasa ber ni turin 'Ka lawm e Lalpa' chu kan ti chhuak ve a, copy 1000 vel lai kha kan siam ve a, Pathian khawngaihna zarah reilote chhung khan a zo vek a, kan lawm ve hle.

Rawngbawlna mah ni se, Pathian hi kan chungah a ṭha em em a, kan phak loh ram vawi tam min chuan tir ve a, chawimawina kan beisei phak loh tam tak hi Amah kaltlang hian vawiin thlengin kan dawng ve a ni.

Kum 2019, August 30 khan kan album pahnihna 'Kei kher maw Lalpa?' chu kan ti chhuak ve leh a, hei pawh hi copy 1000 bawr vel kan siam ve leh a, Pathian khawngaihna zarah reilote chhungin kan hralh zo ve leh thei bawk.

Ruatdiki Chhangte

Rawngbawlna kawngah hian hun nuam leh hlimawm tawn reng theih a ni bik lo a, kum 2020, May 22 khan kan member Lalruatdiki Chhangte chuan mual min liamsan a, member te pawh min deng nâ hle a ni. Ruatdiki hi tleirawl té niin kum 2013 August thla khan OiC hi a rawn zawm ve a, a kul a taia inhmang chhovin group-ah pawh hruaitu te a han ni chho a, rei fe rawngbawlnaa lo inzui ve ngat ngat kan nih avangin a thihna hian mimal tak paw'n min deng ná ve hle a ni.

OiC hmelhmang bera miin an lo hmuh ve a nih avangin 'An tho chhuak tawh lo ang a', tih chu mi tam tak thinlungah a riak ve niin ka hria a, keimah ngei pawh hi ka rilru a inbúk nasa hman hle a ni.

Mahse, Pathian hi a lo ṭha em a, hun harsa karah pawh a rawngbawl chhunzawm thei turin chakna min pe zel a, kum 2021 October 22 a lo inher chhuah meuh chuan One in Christ rawngbawlna chuan chatlak awm miah lovin kum 10 a lo tling ve ta a ni.
Kan hun kal tawh te ka thlir lêt chang hian mihring chakna, phurna leh tumruhna ringawt chu ni se, kan hun hmalamah khan kan tawp fel daih tawhin ka ring ṭhin. Mahse, One in Christ hi chu Pathian min din sak liau liau a nih avang hian Amah vêk hian min kaihhruai sak a, hun harsa karah pawh a khai chhuak leh mai ṭhin a, kan tih a tel ve loh zia a lang leh ṭhin.

Kum tam tak liamtaa nu pakhatin 'Tlangval, duh lo mahla, Pathian rawng hi i la bawl dawn tho tho,' a tih kha Pathian thu ngei a lo ni a, ka kal tum miah lohna kawngah min hruaiin vawiin thleng hian tling lo tak chungin rawngbawl hna kan la thawk chhunzawm ve ta zel a ni.