Aizawl:  Health Minister Dr. R.Lalthangliana chuan, "Mipui ten Online hmanga Doctor an rawn theihna turin Teleconsultation khaw tinah chhawp hnaih a ni tawh a ni," a ti.

World Health Organisation (WHO) din champha April ni 7, 1948 hriatrengna atana April 7-a ‘World Health Day’ hman thin puala thuchah a sawi ah Health Minister Dr. R. Lalthangliana chuan Mizoram mipui khua leh veng tina awm te hrisel tak leh thlamuang taka an awm theihna atana faina leh tui in tur tihthianghlim kawnga hma la zel turin mipui a chah.

Mizoram-ah Health and Welness Center 388 hawn thar a nih tawh thu sawiin, thingtlang kilkhawr tawpah pawh Health and Wellness Center hi a awm kim thawkhat tawh thu leh heng ah te hian a thlawna inenkawlna bakah natna chi hrang hrang nu leh naute hriselna te, natna inkaichhawn theih loh thisen sang, zunthlum, cancer leh a ang te hmuhchhuah vata rang taka enkawl an nih theih nan National Health Mission kaltlangin sawrkarin hma a la mek zel tih a sawi a.

Health Minister chuan sawkar laipui in natna chi hrang hrang do leh tihrem kawnga a hmalakna pakhatah TB chu kum 2025 a umbo turin a puang ta tih sawiin, Mizoram atanga TB umbo a nih theihna tur atan he natna vei inringhlel te chu in entir vat tur leh tha taka damdawi ei turin TB veite a chah a. Covid a ni emaw, natna dangte pawh hma taka enkawl a nih theih nan mipuite chu mithiamte rawn vat tura ngenin, chu chu natna taidarh tur venna pawimawh a nih thu a sawi bawk.