Aizawl: Mizoram Police chuan tunlai hian misual thenkhatin online hmangin mi bumin an sum an laksak thin tih an sawi a. Heng misual te hi state pawna mite an nih thin avang leh a rual deuha thilti an nih avangin manchhuah an har hle niin an sawi.

ZALEN-in Mizoram Police thawktute hnen atanga thu a dawn danin tunhnaiah internet kaltlanga inbumna a hluar hle tih an sawi a, heng inbumna hrang hrang zingah hian Armed Forces Officer / sipai anga inchhal a, an thlalakah uniform ha lai lem leh I.D siamchawp dah thin te an ni tih an sawi a. Heng mite hian bungraw hrang hrang motor, bike, inchhung bungrua te man tlawm taka zuarin pawisa an dawn hnuah an bungraw zawrhte a leitu hnen thlen lovin an bibo thin tih an sawi. Heng mi bum chingte hian sipaiho tana eitur (sangha, sa chi hrang hrang, cake, balhla, etc.) order derin a zuartute an bum thin bawk a, an order man pekna turin a zuartute hnenah QR Code scan tirin a zuartu te pawisa an lakchhuah sak zawk thin tih an sawi bawk.

Police hotute chuan heng misual te hi pawl angin an awm nia an hriat thu ZALEN an hrilh a. Madhya Pradesh, Jharkhand, Bihar, Uttar Pradesh leh central India ah te an khawsa nia an hriat thu an sawi a. Misual te chu manchhuah leh chhui an har tih sawiin, "Misual te hian an mi bumte hnen atang hian Account pangngaia pawisa pe lovin gpay, phonepe, paytm leh thildang hmang te in sum hi an laksak thin a. Hetiang hi chu chhuizui a harsa thin a. Chumai bakah misual te hian call pangngai a be lovin voice call hmang chauha biak an duh a, voice call ah hi chuan call pangngai anga record a awm theih loh avangin chhui a har hle a ni," an ti. 

Misual te hian sim card engemaw zat an nei nia an hriat thu an sawi bawk. Police hotute chuan misual te chu mi 2/1 mai ni lovin a huho leh pawl ang deuha awm nia an rin thu sawiin pawisa pawh an transfer ngahl zel niin ZALEN an hrilh bawk a. "Account pakhata sum lut hi reilote ah Account 10 atanga 15 ah te a in semdarh (transfer) nghal zel a. Chhuizui turin khawi Bank te nge tih leh Bank lam chhanna nghah chhungin misualte hi duh tawkin an lo che hman thin a, Account tam tak an neih bawk avangin chhuizui a har thin hle a ni," an ti bawk. 

Police hotute chuan thiltlawm kan duh luat mi tam takin buaina an tawk tih sawiin Mizo mipuite chu fimkhur se an duh tih an sawi a. Online kaltlanga sumdawnna kan ti dawn anih pawhin a dawr tawhtute comment atangin a rintlak nge rintlak loh hriat tum hmasak ni se. Hei bakah a dawr neitute leh pawisa pekna tur account hming/address a inmil em tih te, bungrua a man pangngai aia tlawm uchuak lutuk a zawrhte hi inbumna a nih duh avangin fimkhur nise an tih bakah online dealership, distributorship, etc. pe thei anga insawi tam tak hi inbumna a nih tlangpui thin avangin finfiah hmasak thin nise an duh tih an sawi bawk.