Aizawl: Aizawl Municipal Corporation (AMC) chuan ni 1.6.2018 (Zirtawpni) chawhnu dar 2:00 atang khan online hmanga in sak dilna leh pekchhuah hna a tan. Online hmanga in sak dilna leh pekchhuahna tur hi AMC Mayor PC Lalhmingthanga chuan chhun dar 12-ah hawngin chawhnu dar 2 atangin he system thar hmang hian hnathawh tan a ni. AMC kalphung thar hi sawifiahin AMC Commissioner Dr. H.Lalthlangliana chuan an hnuaia registered Architect leh Engineer te chu password bik pein anmahni chauhin online hmangin an thehlut thei dawn niin a sawi a. AMC thawktute chuan online hmanga dilna hi lo enfiah nghalin tihfel ngaite tihfel a nih hnuah Commissioner remtihpui turin an thawn thin dawnniin a sawi. AMC Commissioner chuan in sak diltute hi sms  mangin remtih an nih thu emaw, an dilna a kim lo a nih emaw pawhin hriattir an ni dawn nia sawiin dilna hi remtih (approve) a nih veleh a thehluttu chu provisional permit pek a ni dawn niin a sawi bawk. Online hmanga in sak phalna hian concrete building te a huam dawn a, ordinary (assam type) erawh chu a huam dawn lo a ni. Zawhna chhangin AMC Commissioner chuan tuna kalphung thar an hman tur chu a hma aiin a rang dawn niin a sawi a. “A hmaa kan kaldanah chuan dilna hi a kim chuan kar 2/3 chhungin kan peih a, tunah erawh chuan file move a awm tawh dawn loh avangin rang zawk turah kan ngai a ni,” a ti. AMC hian June 1, 2018 hma lama dilna lut tawhte chu enfiah zui zelin June ni 7,2018 hian an office-ah special building clinic buatsaihin tuna awm mek te hi chinfel an tum dawn a ni. Tun dinhmunah building pending hi 694 an nei mek a ni.%%%%