Aizawl: Joint Entrance Examination (JEE), Advanced bik, India rama zirna in tha Indian Institute of Technology (IIT)-a luh tumten an ziah thin exam chu internet kaltlang (online) vekin kum 2018 atang chuan neih a ni ang. Thutlukna hi Joint Admission Board chuan siamin he exam hi zirlai nuai 2 chuangin an bei thin a. JEE-ah hian chhawng hnih awmin a chhawng khatna a tling tawhten IIT luh an duh chuan ‘advanced’ bik hi an beih leh a ngai thin a ni. IIT khera luh tum lo tan chuan a chhawng khatnaa an tlin chuan duhtawkin engineering college hrang hrangah an lut thei tho a ni. Higher & Technical Education (H&TE) Department hotute atanga thudawn danin JEE Exam hnuhnung ber (2017)-ah khan Mizo zirlai 6450in JEE Mains an ziak a, mains-a tling mi 23-in Advanced bik hi an ziak leh a. Mains-a tling, Advanced exam tura tling an awm nual pawhin exam centre hnai ber, Silchar a nih avangin exam tluan lo an tam thin niin Zalen an hrilh bawk. H&TE hotute chuan Aizawl-a exam centre a awm ve nan mi 100 bawr tal tlin a ngaih avangin a tam thei ang berin Advanced chu exam thin tura an duh thu an sawi a, tunah hian online a exam-tu pawhin Aizawlah hmun a awm a, a exam tur an pun phawt a ngai niin an sawi bawk. JEE lam hotute chuan online exam chuan paper a zawhna siama tihsual awm thin a tihbo phah dawn niin an sawi a. Tihsual awm thin avang hian JEE (Advanced) exam buatsaih tu IIT Madras chuan mark 18 bonus mark angin zirlaite hnenah a lo pe tawh a, hei hian sawiselna a titamin online chauha exam neih tura thu tlukna siam pawh hi a nghawng chhuah niin thudawn a ni.