Aizawl: Cooperation Minister Vanlalawmpuii Chawngthu chuan Zirtawpni kalta khan Lungkawlh Community Hall leh Community Centre Building a hawng. Hawnna thu sawiin Minister chuan, “Lungkawlh khua hi Border Area-a awm ni mah sela sawrkarin a ngaihthah lo va, nasa takin BADP hmangin hmasawnna tam tak a siamsak a, chung zinga Community Hall leh Community Centre tha tak an nei chu a lawmawm hle a ni,” a ti a. Lungkawlh khua chu ramri depa awm an nih avangin hnam dang sumdawngte lo dawnsawn dan tawk thiam a tul hle tih sawiin vote nei thar thun chungchangah pawh an fimkhur zual a tul bik thu a sawi bawk. Lungkawlh Community Hall leh Community Centre hawnna inkhawm hi Dorothy Muansangi BDO, E.Lungdar R.D Block in a kaihruai a ni.