Health Minister Dr. R.Lalthangliana hmalakna in mipuiten tangkai zawka an hman theih turin sawrkar damdawi in hrang hranga inentir hun chu zing dar 9 atanga tlai dar 3 thleng neih tawh tur a ni a, OPD Card pek chhuah hun pawh zing 9 atanga chawhnu dar 1 thleng a ni tawh dawn a. Thupek hi OPD doctor duty zawng zawngte chu zawm nghal vek tura hriattir an niin zawm lote chungah dan anga action lak zel tur a ni.

Health Minister hmalakna hi mipui tan chuan a lawmawm hle a, mipui harsatna tam tak a sukiang ngei dawn a. Hetih lai hian Doctor, Nurse leh OPD kaihhnawiha duty tan chuan hna eng emaw zat siam belhna a nih dawn avangin an huphurh mai thei a; mahse, mipui tana thil tha a nih avangin damdawi in thawktute pawhin an zawm hram a tul awm e.

Mizoram doctor-te hi an hah hle a, chutih rual chuan phai lam doctor-te ngaihtuah chuan an hah nep deuh em aw a tih theih. Kan doctor zinga mi tlem tê chauhin non practising allowance an la chungin doctor tam ber hi chuan private clinic neiin zing leh tlaiah an clinic-ah hun an hmang thin. Private clinic hi mipuite mamawhna avanga hawn a ni tiin doctor-te hian an sawi thin a, a dikna chen awm mah se doctor-te hian OPD aiin an private clinic hi an ngai pawimawhin damlo pawh an en uluk deuh niin a lang.

Engpawhnise, damlo OPD-a inentirte hi a tlangpuiin mi harsa leh chhumchhia, thingtlang hmun hla tak tak atanga lo kalte an ni a. Damdawi in tha zawk leh enkawlna tha dawng phak lote an ni a; chuvangin, an innghahna chu sawrkar damdawi in hi a ni lo thei lo a ni. Sawrkar damdawi in hi pantu an tam a; chuvangin, OPD card pawh lak hma loh chuan nileng deuh thawa inentirin hun hman a ngai fo mai.

Doctor ten test chi hrang hrang X-ray, ecg etc tir turin damlote an tir thin a, test chi khat ti tur pawhin hun eng emaw chen nghah te a ngai thin. Chuvangin, test chi hnih chi thum tih a ngaih chang chuan ni eng emaw zat hun hman a ngai thin a, OPD-ah doctor an thut tawh loh phei chuan result entirin ni dangah kal leh a ngai thin a, damloten hun tam tak an sen a ngai thin.

Chuvangin, Health Minister ruahmanna thar hi doctor-te pawhin mipuite harsatna sutkianna tur a ni tih hriain thuawih takin zawm vek thei se a duhawm hle.