— C.Dorema
4/30, Khasi Veng, Kulikawn


Aizawl -976005 Open Defecation Free (ODF) tih hi chu mi tam tak chuan kan hriat thiam leh a pawimawhna thleng pawha kan hriat a ni awm e; nimahsela, hre lo pawh a la awm theih avangin han sawi fiah dawn ila: Ek in/zun in ni lo, kawng sirah emaw, kawrah emaw, daiah emaw, mihring leh ran te, rannung leh tho pawhin an khawih leh bawm theih lohna ek in ngeia zun leh ek thin hi hriselna tha kan neihna tur leh natna leh hri inkaidarh theih natna thenkhat laka kan himna tur a nih avangin a pawimawh em em a. Chutianga zun leh ek - hmun ualau lai leh ek in ni lo hmun danga inthiar thin hi “Open Defecation” kan tih chu a ni mai. Tin, chutianga inthiar thin awm lohna, ek inah chauh inthiar thinna chhungkua, veng, khua leh ram chu ODF chhungkua, veng, khua leh ram kan tih chu an ni.
Hetiang lam kawnga harsatna hi India ramah hian a nasa em em thin a. Vai ram hmun tam takah chuan ek in nei lo, buh hmun leh hmun awl remchang apianga inthiar mai mai thin, pi leh pute lam atanga an awm dan lo ni tawh leh an nunphunga neih tlat tawh, mi tam zawk chu an ni a. Rail-a han zin veivah ve chang pawh hian chutiang chu hmuh tur a tam thei hle thin. ODF kan tih chuan hetianga inthiar thin zawng zawngte anmahni inchhung leh vantlang ek in ngeia inthiar thin tura an nunphung thlaktir chu hna hautak tak a tling hmel khawp mai. Nimahsela, mipui leh sawrkar thawhhona tha tak nen a hlawhtlinna hmuh ngei a beiseiawm hle a ni. Keini Mizo zingah pawh tunhma deuh kha chuan daia inthiar mai mai, ui leh vawk ei ral mai theih tura inthiar mai mai thin leh nau ek leh mawng pawh ui liah faitir mai thinte pawh kan lo awm tawh thin a ni ang, sawi a awm thin. Keini Aizawla piang leh seilian ngei pawhin kan hun paltlang tawhah khan kan dai velah hi chuan englai pawhin ek thing rim hi nam deuh vung vung reng mai a nihzia kan hmuin kan hria a; kan chet velnaah mihring ek rah pherh chang a awm fo thin a ni. Tin, sapho hunlai atangin sawrkarin Aizawl veng hrang hrangah vantlang ek in an siam a, chutiang ek in chu Bazar Bungkawnah te, Virmep tlang kan tih thin, tuna Health Department ramah te, Mission veng Bazarah te, Sikulpuikawn (Republic Rd. lamah), Zodin Cinema Hall bul, etc.–ah te siam a ni a. Kan school neih that ber Govt. Mizo High School, Chanmariah pawh hian 1966 vel thleng kha chuan chutiang ek in chu hman a niin, Chanmari West lam ko liamah sawn paih mai a ni thin a ni. Chutiang ek inah chuan a chhuat lung rem kanga siamin a laiah khawnvartui tin/baltin rawlhluh theihna tur lei rualin dah awl a ni a. Chutah chuan tin dawh niin ek leh zun tling khawm kha ek paihtu (Mirawng)-ho khan a pawh atanga a dawhna tin lain anmahni tinah chhunglutin an khawn khawm a Mirawng veng, tuna Tuithiang Veng leh Saron Veng inrina lai velah khuan an paih thin a ni. A bul hnaiah chutiang ek paihtute chu an chen avangin Mirawng Veng tih a ni reng thin a, vawiin thlengin Mirawng lui hming pu Chite lui fintu lui kan la nei a ni. Nimahsela, tunlaiah erawh hi chuan mahni chenna in kan ek inah ngeia inthiar thin hi kan ni deuh vek tawh niin ka hria a, chhungkua pawh hetiang vantlang ek in ring hi sawi tur an awm pawh kan hre ngai lo va, thingtlang khuaah pawh Mizo khuaah chuan hetiang hi kan awm dan a ni tlangpuiin ka hria.
India sawrkar hian Mahatma Gandhi piancham vawi 150-na October 2, 2019 hian India ram pumah ek in ni lo hmun danga inthiar thin chhungkua zawng zawngten ek in pangngai tak an neih theuh theih nan hma a lain bawlhhlawh senghawi leh thehthang kawngah pawh kan chenna leh a vel a lo faina turin hma a la mek a. Heng tihlawhtling tur hian thingtlang khaw tam takah inzirtirna leh infuihnate namenlova nasaa neiin ek in thar maktaduai 12 zet siam tura hma lak a ni a,heta sum sen tur ruahman pawh cheng vaibelchhe sangkhat zakua sawmruk (Rs. 1,960,000,000,000/-) lai a tling a ni. Hetiang kawnga hmalakna hi Swachh Bharat tia hming vuahin, ODF hi a peng pakhat atan kalpui a niin October 2, 2014 khan bul tan a ni a. He hmalakna bul tannaa Prime Minister Pu Narendra Modi-an mipui hmaa fuihna thuchah a sawiah chuan:

In farnute leh in nute buhhmun leh hmun ualau laia an inthiar lo thei lova an awm hi in lainat thin em? Hetianga mi hmuh theiha inthiar an duh loh avanga ek chhuak ngawih ngawih chung pawha zan khaw thim nghah kher kher ngai thinte kha an lo va khawngaihthlakin an lo va lainatawm tehlul em! Heti taka kan nute leh kan farnuten harsatna hei chen an lo tuar leh natna leh hri tam tak karah zan thim hnuaia che vel lo thei lova kan lo awmtir reng mai hi kan titawp thei dawn lawm ni!!

Hmeichhe naupangten sikulah lehkha an han zir ve a, an lo thang lianin an lo pawl sang ve tial tial a, hmeichhe nihphung pangngai angin, an thanthi neih hun a lo thleng a, sikul velah han inchinfelna tur hmun engmah a awm si loh avangin an zirlai an tawpsan a tul ta mai thin a ni. Chutiang ang chuan mipa leh hmeichhia chu lehkha zir leh thiamna kawngah kan in anglovin hmeichhiate dinhmun chu tleirawl an lo nih dawn atanga sikul zirlai tawpsan a ngai ta bik thin a nih chu!! India ramin mahnia inrelbawlna hrang kan neih hnu kum 60-ah pawh sikul zawng zawnga hmeichhe pual inthiarna leh an hmeichhe- pawimawh inchin fel theihna tur hmun kan lo la neihsak thin lo hi a pawi takzetin kan hmeichhe tam tak, mi thiam ni thei tur pawhin heng thil avang hian an sikul zirlai bansan lo thei lovin kan lo awmtir thin hi a pawi takzet a ni.
Chuvangin, he hmalakna hnuaiah hian chhungkua zawng zawngin mahni puala ek in leh zun in nei vek turin leh zirna in zawng zawngah pawh hmeichhiaten a hranga inthiarna an neih vek theihna turin hma kan la mek a, a hlawhtling ngei ngei tura beisei a ni bawk a ni. He hmalakna hi a pawimawh em em a, India khua leh tui zawng zawngin mahni zawn theuhah he hmalakna hi tihlawhtling turin mawh kan phur theuh a ni tih hi keini Mizote pawh hian kan ngaihtuah a pawimawh a, lo engto theuh turin India khua leh tui zawng zawng min sawm a ni.
India sawrkar hian sanitation lam kawnga hmalakna hi kum 1999 lam daih atang pawh khan Total Sanitation programme tia kalpuiin hma lak a lo ni tawh a; nimahsela, tuna Swachh Bharat hmalakna ang taka urhsun leh dah pawimawhna hi a la awm ngai lo ni pawhin a lang. October 2, 2014 atang kha chuan India ram pumah ODF ni vek tura hmalakna hi nasa taka neih a lo ni ta a. State tinte hmalakna record siama report buatsaih reng a ngai a, hei hian mipui leh sawrkar a titangin hmasawnna nasa takin a kal mek a ni.
Chutiang chuan keini Mizoram pawhin kum 2017 khan Champhai, Aizawl leh Serchhip khawpuite ODF-ah kan puang ve a, 2018-ah erawh chuan Mizoramah PHE Deptt. te, LAD te, UD &PA, etc te’n nasa taka an beihna azarah Mizorama thingtlang leh khawpui lian leh tê zawk zawng zawng pawh ODF-ah puan a lo ni vek ta a ni. A nihna takah chuan hetiang kawngah hi chuan Mizote hi kan changkang khawp mai a, ODF state-a puan hmasak indawt danah 15-na chauh kan nite hi a tlawmthlak lek lek niin ka hria. He lam kawngah hian nachang lo hre hma ni ila chuan state dang aia hma khan ODF-a puan theih kan nih hial pawh a beiseiawm asin maw le! Kum 1966-ah, Mizoram ram buai hma chiah khan ka ute zuiin kei pawh N.Vanlaiphaiah ka han zin ve a; khatih lai khan N.Vanlaiphaiah chuan ek in nei lo chhungkua pakhatmah an awm lo va, motor (light vehicle) luh theih lohna in pakhatmah a awm lo bawk tih ka han hmu ve a ni.
Hetih rual hian ODF nihna dik tak hi Aizawl khawpui ber pawh hian kan la phak ziktluak lo deuh niin ka hre thin. A chhan chu kan khawpui chhung kawngsir ualau lai tak takah kopang behchhana patling zung to to hmuh tur hi kan la awm fo mai te, a kilkhawr deuh lai apianga zun ram kan thiar thinte hi ODF-in tihbo a tum pawimawh tak a ni ve a ni. Heng hi kan bansan fel vek loh chuan ODF khua/veng hi chu ziktluak takin kan la ni lo dawn a ni tih hi sawi a pawimawh tlat. Chutih rual erawh chuan, hetiang ti kan hmuh pawh hi va dem vak theih pawh a ni lo, chutiang tihna hmun remchang a awm miau lovah chuan loh theih lohva an zun mai a tul tlat thei thin a ni. Kawngpui sira in neitute zun/ek in hman dil ngawtte hi thil harsa tak a ni bawk si a. Heng kawngah hian sawrkar leh khawtlang hian tih tur pawimawh kan la nei awm e.
Engpawhnise, India ram khawpui leh state zawng zawng zingah hian Mizoram hi sik leh sa nei nuam ber leh ram ruak enkawl loh hmun awl nei tam berte zinga mi kan ni ngei ang. Tin, thing leh mau an tha duh a, hnim chi hrang hrang pawh a that duhna ber a tling hial awm e. Tin, kan inpekna leh kan ngaihsan zawngah chuan a chhunga cheng Mizote hian thil kan ti ve thei a ni tih chu football khawvelah te, ziak leh chhiar thiam kawngahte leh zai lamah te hian a lang reng mai. Tin, hma kan sawnin kan khawsak hrim hrimah nasa takin hma kan lo sawn tawh a, kan kar kawngte pawh hi chei that theihin a ruhrel chu kan nei tha ve thawkhat tawh a ni a. Kan sawi tak ODF lama kan changkanna te, faina leh thianghlimna kawng hrang hrangahte hian ram changkang zawkte hi entawn hian hma han la ila; kan ram ruakte hi ramngawah han chei leh ta ila chuan khawvelah hian ram dang han awh tur hi a tam lo hle ang tih a beiseiawm hle a ni. Hetiang kawnga hmasawnna tur hian ngaihtuahna kan buatsaih leh kan thlah lo awm zel turte tana chenna leh ram tha zawk, nuam leh mawi bawk si buatsaih zel theih hi a va duhmawm em! Heng zawng zawng hi tu mawh nge ni le? Chutiang tura Mizoram chei a siam tha theitu chu mipui leh sawrkar hi kan ni.