Aizawl; Nimin khan MZP Pisa pui ah MZP hruaitute leh National Institute of Open Schooling (NIOS) hnuaia zirna in enkawltu ten joint meeting an nei a, Open School a zirlaite harsatna tawh thin chungchang sawihoin “Mizoram chhunga NIOS hnuaia zirlai zawng zawng ten kum tin Scholarship Board atanga Re-Inbursement Rs 2600/- an dawn thin chu zirlaite hnenah kim taka pek ni tawh rawh se,” an ti. Hei bakah hian joint meeting chuan kum 2013 - 2014 session chhunga Re-Imbursement dawng kim lo zirlaite hnenah June ni 21,2014 ral hma in Open School tin ten pe kim leh vek se an ti a. NIOS hnuaia zirna In tin ten zirlaite hnen atanga pawisa an dawnna leh pek chhuahna tichiang turin receipt emaw voucher emaw fel fai takin siam thin nise an ti bawk. National Institute of Open Schooling (NIOS) hnuaiah hian Mizoram chhungah Accredited Institution 18 awmin, an hnuaiah hian Coaching Centre enge maw zat a awm bawk a ni. NIOS chung changah hian thuchhuah siamin MZP chuan April ni 26, 2014 a School Education Directorate Conference Hall a Education Department hotute leh NIOS Co-ordinator te meeting in Private Coaching Centre te khuahkhirh an nih tur an lo rel tawh ah hmalakna mumal hmuh tur la awm lo nia sawiin pawi an ti hle tih an sawi a. Open School a zirlaite hamthatna tur ngaihtuah a, an harsatnate chingfel turin MZP chu a inhawng tih an sawi.