Agriculture Minister C.Lalrinsanga chuan tunhnai khan Aizawl South III chhunga lo neia eizawng tute Awareness Campaign on Enhancement and Value Addition of Agriculture Produce a hmanpuinaah hlo hlauhawm hmang leh damdawi tel loa lo neih, ‘Organic Farming’ chu Mizoram lo neitu ten uar zel turin a fuih a.

Organic Farming chu Mizorama loneitute tih theih reng leh a bikin Aizawl hnaih lama awmten an tih reng a ni a, mumal taka Organic Farming kalpui a nih nan pawh Mizoram sawrkarin Organic Farming Act a neihsa pawh kaih thawh thar leh a nih tur thu a sawi a ni. Organic farming chungchangah hian Mizorama sawrkarna chelhtu MNF leh Congress ngaihdan hi a inpersan hle niin a lang a. MNF sawrkar term hmasaah khan Organic farming uar a that thu leh Mizoram pawh organic state-ah siam an tum thu an tlangaupui nasa hle a, hma pawh eng emaw chen chu an la hman a ni. MNF sawrkar a tlak a, Congress sawrkar a lo din khan thlai thar a hlawk zawk nan leh ram dangah pawh an uar leh hman lai mek a nih bawk avangin chemical fertilizer lam an rawn sawimawi leh a. Sawrkar hmasa in organic farming a lo kalpui tawh chu damdawi hman lamah min letpui leh a. Tunah MNF sawrkar lo ding lehin organic lam an tuipui leh dawn ta niin a lang.

Organic hi a tha a, damdawi hmang lova thlai chawm anih avangin ram changkang ten an duh bik a, a man pawh a to bik a ni. Mahse, organic-ah chuan thlai thar a hlawk lo a, damdawi hmanga thlai chawm a nih chuan a thar pawh a hlawk bik avangin hmun tam takah an uar phah a ni. Mizoramah hian organic farming hi uarin, a tak takin han kalpui dawn ta ila kan tlin ang em tih hi zawhna pawimawh leh chhan har tak a ni. Kan thlai tharte organic a ni tiin ram dangah te thawn chhuak dawn ta ila tute emaw khawvel pawhin rintlaka a ngaih ten certification an pek loh chuan pawm a ni dawn lo a, certification tih mante hi a to em em mai si a, kan kawng zawh tur hi a la thui hle. Chutih rual erawh chuan organic hmanga kan thlai te kan chawm a nih chuan mipuite pawhin thlai hrisel kan ei ang a, kan hrisel phah ngei ang.

Organic farming chungchangah hian a lehlam lehlamah tanchhan tur tam tak a awm a, khawi zawk hi nge kan ram hian kalpui ila tha ang tih hi mi thiamte hian uluk taka an ngaihtuah a, kan ram tana tha zawk turah chuan huai taka ke an pen a hun ta hle. Tun dinhmunah chuan sawrkar inthlak apiangin an policy a dang dawn niin a lang a, a changa organic uar, a changa organic lo lam uar nih rikngawt hi chu a fuh lo. Hetiang renga kan kal chuan loneitute a tibuai a, a tuartu tur chu kuthnathawk te hi an ni. Chuvangin, sawrkar hian a kalpui tur lam hi uluk takin zirchiang se, policy thlak fo lo hian a tha ber turah mipuite hi min kaihruai teh se.