Music, sport leh film lamahte hian award ngaihhlut bik a awm thin a, film lamah bik chuan Oscars hi khawvelin a dahsan ber chu a ni. Oscars 2023 (Academy Awards) chu naktuk zing dar 6:30 hian sem a ni dawn ta. 

Hollywood chu 95th Academy Award atan hian a inbuatsaih mup mup tawh a, award ceremony-a tel tum mikhualte pawhin US an pan chuah chuah tawh. Dolby Theatre, Hollywood, California-ah Pathianni zan hian sem a ni dawn a, India ramah chuan Thawhtanni zing dar 6:30 atangin en theih a ni ang. 

Nomination hmu hnem
Oscars dawng thei tura chhawpchhuah nomination hi puan a lo ni tawh a, 'Everything Everywhere All at Once' chu a langsar fal hle. He American comedy-drama film hi nikum September thla khan tlangzarh a ni a, chawimawina pawh a dawng hnem tawh hle. 

Film lama chawimawina ngaihhlut ber Oscars-ah pawh rin lawk ang ngeiin a langsar a, category 11-ah zet a lang. A changtu pawimawh zingah Malaysian actress Michelle Yeoh a tel a, Asian mipui mitfukna tur a ni a ni ang. 

All Quiet on the Western Front chuan nomination 9 lai a hmu ve bawk a, The Banshees of Inisherin nen an hmuh zat a inang. Austin Butler, Tom Hanks leh Olivia Dijon te channa Elvis chu category 8-ah a lang a, award a hlawh chhuah ngei pawh a rinawm. He biopic hi zaithiam hming thang Elvis Presley chanchin tarlanna niin, Austin Butler chu Elvis Presley lemah hian a chang a ni. The Fabelmans chu category 7-ah a lang ve bawk. 

All Quiet on the Western Front, The Banshees of Inisherin, Elvis, Everything Everywhere All at Once leh The Fabelmans te hian award ngaihhlut Best Picture an inchuh dawn a ni. 

Deepika-i'n US a theng 
India chhul chhuak zinga Oscars 2023-a award hlantu (presenter) atana an thlan awm chhun Deepika Padukone chuan Zirtawpni khan Los Angeles, USA a pan a, a pasal Ranveer Singh chuan Mumbai airport atangin a vai liam a ni. India chhuanvawr Hollywood thlenga hriat hlawh Deepika hi Louis Vuitton Fashion Week, Paris-ah a tel zo chauh bawk a, a indaih lo ve hle! 

Oscars 2023-ah hian film lama mi chal lang tak tak mi 40 te chu award hlantu atan thlan chhuah an ni a, chung zingah chuan Deepika Padukone pawh hi a tel a ni. Anni bakah hiann - Dwayne Johnson, Emily Blunt, Samuel L. Jackson, Jonathan Majors leh Michael B. Jordan te pawh an tel. 

RRR a ropui ang em?
Bollywood film lar em em mai RRR hian chawimawina tam tak a dawng tawh a, a dawng mek zel bawk. Fim lama award ngaihhlut ber Oscars-ah pawh chawimawina dawng thei tura chhawpchhuah zingah a tel ve ta hial a, award a dawng a nih ngat phei chuan a ropui leh zual khawp ang le. 

RRR hian an original soundtrack 'Naatu Naatu' hmangin nomination an hmu a, Best Song category-ah chhawpchhuah a ni. Oscars ceremony-ah hian 'Naatu Naatu' hi live-a perform a ni dawn cheu bawk a, award a lo dawng ta lo hlauh a nih pawhin hriat reng tawh tur a hnutchhiah tawh hrim hrim. 

Indian movie - All That Breathes leh The Elephant Whisperers chu Best Documentary Feature leh Best Documentary Short categy-ahte an lang ve bawk. 

Indian ka nihna ka pho lang dawn - Jr. NTR
'RRR' star Nandamuri Taraka Rama Rao Jr. (Jr. NTR) chuan Oscars 2023-ah Indian a nihna phoan a tum hle. Jr. NTR chuan, "RRR changtu ten red carpet kan zawh dawn a, mahse Indian film industry actor ang ni lovin Indian ka nihna angin red carpet ka zawh dawn. Ka thinlung hi Indian ka nih avanga inchhuannain a khat a ni," tiin a sawi. 

Oscars-ah hian 'RRR' team te an inlan dawn a, nomination an hmuh bakah hian an perform dawn bawk avangin an phur hle. An director SS Rajamouli leh Ram Charan te pawh an inlan dawn e.

Enna tur lam hi?
Oscars sem programme hi ABC Network chuan - YouTube, Hulu Live TV, Direct TV, FUBO TV leh AT&T TV-ahte an pechhuak dawn a, India atang pawhin a en theih dawn a, Disney+Hotstar chuan live-in an pe chhuak dawn a ni.