Lemchan khawvela chawimawina ngaihhlut ber Academy Awards (Oscars) chu March thla khian sem a ni leh dawn a, India film pathumin nomination an hmu. 95th Academy Award-ah hian tun lai Bollywood film lar - RRR, All That Breathes leh The Elephant Whisperers te an lang a, film lama chawimawina ngaihhlut Oscars dawng thei dinhmunah an ding ve mek. 

Academy of Motion Picture Arts and Sciences chuan January 24, Thawhlehni khan Oscars dawng thei tura hming chhawpchhuahte hi a puang a, ngaihven a hlawh nghal hle. Nomination hi Allison Williams leh Riz Ahmed te chuan an puang a, India kut chhuak film pathum a lan ve avangin ngaihven a hlawh zual. 

Bollywood Documentary film - All That Breathes leh The Elephant Whisperers te chu Best Documentary Feature Film leh Best Documentary Short Film category-ahte an lang a, chawimawina dawng thei dinhmunah an ding mek. Oscars a nih tawh chuan eng category pawh a hlu em em vek a, lemchan thiam lar tak tak zingah pawh dawng lo an la awm nual avangin dawn awlsam tak a ni loh tih erawh hriat tel a tha. 

RRR a vul zel
Nikuma tlangzarh kha a ni a, khawvel huap film lama chawimawina hrang hrang 10 chuang a dawng der tawh - award ngaihhlut ber mai Oscars-ah pawh an hming a chuang leh vang ta mai. Indian film director SS Rajamouli-a kutchhuak RRR hian an original song 'Naatu Naatu' hmangin Best Original Song category-ah nomination a hmu a, category dangah erawh an lang lo. 

RRR film siam nana an budget hi cheng vaibelchhe 550 zet a ni a, Bollywood-ah hei aia budget sang hi a la awm lo. A tirah kum 2020-a tlangzarh tura ruahman ni mah se Covid-19 avangin vawi eng emaw zat sawn a ni a, nikum March thla khan an tlangzarh ta chauh a ni. 

An tlangzarh ni hian khawvel hmun hrang hrang atangin vaibelchhe 240 zet a lalut thei a, Bollywood film zinga ni khata sum alut hnem ber record a siam hial. Hemi hnu hian Andhra Pradesh leh Telangana atang ringawt pawhin vaibelchhe 415 a laut thei a, pui rem rem tak a ni. A sum lakluh tawh zawng zawg hi vaibechhe 1,250 a chuang tawh a, sum lakluh lama a chet that tluk zet hian award lamah pawh a che tha zui a ni - Oscars a dawng leh ngat a nih chuan a ropuina leh zual khawp ang le. 

95th Academy Award hian kum 2022 chhunga film chhuakte a huam dawn a, March 12, 2023 khian Dolby Theatre, Los Angeles-ah sem a ni ang. Award ceremony hi United States-ah chuan ABC ten an pechhuak dawn a, comedian Jimmy Kimmel chuan a vawi thum nan a host dawn a ni. 

India film lanna category te : 
Best Documentary Feature Film
All That Breathes
All the Beauty and the Bloodshed
Fire of Love
A House Made of Splinters
Navalny

Best Documentary Short Film
The Elephant Whisperers
Haulout
How Do You Measure a Year?
The Martha Mitchell Effect
Stranger at the Gate

Best Original Song
Applause” (Tell It Like a Woman)
Hold My Hand” (Top Gun: Maverick)
Lift Me Up” (Black Panther: Wakanda Forever)
Naatu Naatu” (RRR)
This Is a Life” (Everything Everywhere All at Once)