Super Bowl Halftime Show-ah ropui takin a inlan zo chauh a, Oscars 2023-ah pawh Rihanna bawk kan hmu leh dawn. 95th Academy Awards hi March 12 hian Dolby Theatre, Ovation Hollywood-ah sem a ni dawn a, Barbadian singer hi raipuar chungin a inthehthil leh dawn a nih hmel hle. 

Kum 35 mi Rihanna hian 'Black Panther : Wakanda Forever' a an hla 'Lift Me Up' a sa dawn a, award ceremony boruak a pui leh viau dawn e. 'Lift Me Up' hi Tems, Rihanna, Ryan Coogler leh Ludwig Goransson ten an inphuah tawm a, Rihanna hian a sa ta a ni. 

Rihanna hi a kawppui ASAP Rocky nen innei mai tur anga sawi thawm a awm mek bawk a, thudik a ni em tih erawh hriat a ni lo. ASAP Rocky nen hian fa pakhat an nei tawh a, Rihanna hian a pahnihna tur a pai leh mek a ni. 

Oscars-ah hian raipuar chunga inlan an lo awm nual tawh a, award hlantu leh dawngtu an ni tlangpui. Zai tura sawm zingah chuan Catherine Zeta-Jones chu rai puar chunga perform awm chhun a ni rih a, Rihanna hian a hnung a rawn zui dawn a ni. 
Jones hi kum 2003 khan Oscars-ah hian a perform a, kha tih lai khan thla riat mi lai nau a pai. Hemi tum hian Jones hian Oscars award a humhaw nghe nghe a, Best Supporting Actress atan thlan a ni. 

Rihanna hian kum 2016 hnu lamah album a la tichhuak leh lo a, heti chung hian show lian thamah sawmna a la dawng ve zel - a ropuina sawi nep theih a ni lo.