Film lama chawimawina ngaihhlut ber tih ngam Oscars chu March 12 hian sem a ni dawn a, award hlantu tur pawh an hrawl hlawm hle. Chung zingah chuan Bollywood star Deepika Padukone pawh a tel a, Indian zinga hming lang phak awm chhun a ni.
 
95th Academy Award-ah hian - Dwayne Johnson leh Emily Blunt te chu award hlantu tur presenter zingah an tel a, anni bakah hian Samuel L. Jackson, Jonathan Majors leh Michael B. Jordan te pawh an tel. Chung zingah chuan India chhuanvawr Deepika Padukone pawh a tel ve dawn tihna a nih chu - a pasal Ranveer Singh pawhin a nupui hi a chhuan thu a sawi chhuak nghe nghe.

Oscars sem turah hian presenter chauh a ni lo a, nomination hmu phak pawh Indian film pathum chauh an awm. Tun hnaia hlawhtlinna tam tak chang chho mek RRR chu award dawng phak tura beisei zingah a tel a, All That Breathes leh The Elephant Whisperers te an lang ve bawk. 

RRR hian an original soundtrack 'Naatu Naatu' hmangin nomination an hmu a, Best Song category-ah chhawpchhuah an ni. All That Breathes leh The Elephant Whisperers te hi - Best Documentary Feature leh Best Documentary Short categy-ahte an lang ve bawk. Thil chhinchhiah tlak tak pakhat chu Oscars ceremony-ah hian RRR 'Naatu Naatu' hi live-a perform a ni dawn a ni. 
Oscars 2023 hi Dolby Theatre, Los Angeles-ah sem a ni dawn a, India ramah chuan March 13 zing dar 5:30 atangin a en theih ang.