DOWNLOAD OUR APP

Read latest news on your phone
app-store

Pa ni tura hun tha ber mai chu...

Jun 19, 2022

Mipa te chuan nupui nei har deuh mah se a pawina a awm hleinem tih tawngkam kan hre fo thin ngei ang, hmeichhiate nena khai khin chuan a dikna chen pawh a awm ngei ang. Mahse mithiam te chuan pa ni tura kum duhthusam leh tha bik a awm niin an sawi mauh mai - i pawm zawng a ni em?

Mipa te chuan nupui nei har deuh mah se a pawina a awm hleinem tih tawngkam kan hre fo thin ngei ang, hmeichhiate nena khai khin chuan a dikna chen pawh a awm ngei ang. Mahse mithiam te chuan pa ni tura kum duhthusam leh tha bik a awm niin an sawi mauh mai - i pawm zawng a ni em?


Zirmi te chuan pa ni tura taksa leh rilru a inpeih lai ber chu kum 20 atanga kum 30 inkar a nih thu an sawi a, a dik hmel viau mai. Mipa te hian kum 50 vel thleng fa an nei thei a, a hnuah erawh chi an thlah theihna chance a tlem tawh hle. Guinness World Record-a fa nei thei upa ber erawh kum 92 mi a ni thung a, mahse hetiang hi chu sawi tur an tam lo. Mipa chu kum 40 a lo tlin chuan zawi zawiin a chi thlah theihna chance a hniam tial tial a, hei ai hian hmeichhiaah a nasa zawk bawk a, hmeichhia te naupai theih hun hi mipate chi thlah theih hun chhung aiin a rei lo zawk a ni. 
Zir chianna atanga a lan danin pa ni tura mipa te kum zat duhthusam chu kum 20-30 inkar a ni a, mitam zawk chuan hemi kum chhung hian nupui an nei, tun laiah erawh kum 30 pelh hnua nupui nei chauh sawi tur an tam ta viau mai. Mihringah chuan kum 20 atanga 30 inkar hi rilru leh taksa a fit that lai a ni a, mipa leh hmeichhe tan hetih hun lai hi chhungkaw din tura rilru a kalbing lai niin an sawi. 
Nu leh pa ni tur hian kum bithliah awm lo mah se naupang lutuk leh upa lutuk a awm thei tih hriat erawh a tha. Journal of Epidemiology & Community Health-a zirchianna an tihchhuahah chuan kum 25 tlin hmaa pa nih chuan hriselna lamah harsatna nasa tak a thlen thei a, kum naupang tein hun lo taka thihna a thlen thei tih an tarlang mauh mai! He zirchianna ve thung hi chuan kum 30 atanga kum 44 inkara nupui nei te dinhmun chu tha berah a dah a, nupui nei hma te aiin an hriselna a tha zawk niin an sawi a ni. 
Mipa chi leh hmeichhe chi hi chhan hrang hrang vangin a danglam thei bawk a, ei leh in vang te, zuk leh hmuam tih nasat vang te, ruihhlo tih vang te leh hriselna dinhmun a zir tein a danglam thin a ni. Eng pawh nise kan hriselna dinhmun a zir theuhin a danglam thei viau awm e, nupui pasal nei tur chuan kum zat a pawimawh rualin rilru leh taksa a inpeih hmasa phawt tur a ni. 

Share now