Doubles World No. 1 hlui, Leander Paes leh broadcaster Vijay Amritraj te chu Nilaini khan International Tennis Hall of Fame-a lak luh an ni dawn tih puan a ni a, Asian mipa zinga an hming chuang hmasa ber tur an ni ang.

Chanchinbu mi leh thu ziaktu hriat hlawh tak, Richard Evans chu tennis chawimawina sangah a hming ziah luh a ni ve dawn bawk.

Kum 50 mi ni tawh, Paes hi Grand Slam-ah men’s leh mixed doubles-ah vawi 18 zet champion a lo ni tawh a. Player hlui tho, Amritraj-a nen hian Hall of Fame-ah lutin India chu a tel thei ram 28-na an nihtir dawn a ni.

Class of 2024 hi July 24, 2024 hian Newport, Rhode Island, US-ah lak luh an ni ang.

The Hall-ah hian kum 1955 vel atanga mi lak luh tan an ni a, Newport hi an hmunpui a ni.

Amritraj leh Evans te hi Contributor Category-ah lak luh an ni dawn a, Paes-a erawh Player Category-ah seng luh a ni thung ang.

Asia atang hian kum 2019 khan Grand Slam maltana vawi hnih champion tawh, Chinese Li Na chu The Hall-ah seng luh niin a hmasa ber a ni a. Indian player hlui pahnihte hi Asian mipa zinga a hmasa ber an ni ve thung dawn a ni.

Paes-a hi kum hnih an awl hnua Player Category-a seng luh leh tur chauh a ni a. Kum 2022 khan a vawi khat nan chhawpchhuah zing atang thlan tlin zawh tumah an awm lo va, 2023-ah pawh tumah tling zo an awm chuang lo leh.

Lak luh tura chhawpchhuahte hian ballot-a vote thlakah 75% tal an hmuh phak a ngai a. Thlangtute zingah hian chanchinbu mi, historian, Hall of Fame member, industry expert leh fan-te a tel thin.

Paes-a hi Grand Slam men’s doubles-ah vawi riat leh mixed doubles-ah vawi 10 a champion a, huang hniha Grand Slam-a champion kawp thei mipa pathum zingah a tel a. A kawppui thin, Martina Navratilova-i nen Grand Slam mixed doubles-a champion tam ber an ni bawk.

ATP tour-ah men’s doubles-ah nomawi vawi 55 zet lain ATP doubles ranking-ah chawlhkar 37 zet No. 1 nihna a lo hauh tawh bawk.

Davis Cup-ah India tan doubles-ah vawi 45 zet hnehna a chan chu record ding lai a la ni reng a. Olympic Games-ah vawi sarih zet inlanin mipa tennis player-ah inlan tam ber a ni a, Atlanta Games 1996 khan mipa maltanah bronze medal a la nghe nghe.

Amritraj-a hi kum 1970 leh ‘80 chho vela khel daih tawh a ni ve thung a, Davis Cup-ah India chu 1974 leh 1987 khan final a thlenpui nghe nghe.

A inkhelh loh hnuah tennis broadcaster leh administrator a ni zui a, mihring dikna chanvo humhalhna lamah nasa takin a thawk bawk.