Aizawl:  Higher & Technical Education Minister Dr.R.Lalthangliana chuan nimina Government Serchhip College-a 'Science Building' sak thar a hawn  naah ziak leh chhiara pakhatna ni turin tan zel a tul thu a sawi. 

H&TE Minister, Dr.R.Lalthangliana chuan, School Education Minister a nih lai atang tawhin Mizoram chu India rama Literacy rate-ah pakhatna nih tir tumin tan a lak dan te sawiin, “Tun thlengin Kerela chu kan la tluk thei lo va, pahnihna kan la ni reng a, pakhatna ni thei turin tan la thar zel ang u,” a ti. Serchhip District chu Mizorama hmun laili tak niin Mizo tawng dik hmanna hmun nia a hriat thu a sawi. “Vawiina kan hun hman hi a pawimawh em em a, Mizorama College 30 dawn awmah tumahin A-grade an hmuh theih loh laia Serchhip Government College-in a hmu thei hi thil chhinchhiah tlak leh hmasawnna ropui tak a ni a, ka lawmpui takzet a ni,” a ti a bawk.

H&TE Minister chuan, “Administrative building, Science laboratory building chu a pawimawh em em rualin, Residence Quarters hrang hrang te, Hostel-te hi College hian campus-ah a ken tel ngei ngei a ngai tih hi ka rilrua a lian ber a ni thin a. School building tha tak hnuaiah chuan kawng tin rengin zirlai naupang hian zirna lamah hma an sawn ngei ngeiin ka ring a. A tak taka zirlaite thiamna hai chhuah hi a pawimawh em em a, degree emaw certificate tha leh mark hmuh san ringawt a tawk lo, a tak taka thiamna zirlaiten an neih hi a pawimawh ber zawk chu a ni, kan thiamna hian a daihzai a ngai hle a ni,” a ti.  Kristian ram kan in tih lai te, ram ralmuang kan intih laite hian Central Service lam kan nei hlei thei lo ta hi kan inenfiah a ngai hle a ni chuvangin kan thil tih reng rengah taimakna, tumruhna leh thawhrimna nen i bei tak tak ang u tiin he hunah hian a sawi. 

Nazuk Kumar, IAS, Deputy Commissioner Serchhip pawhin he hunah hian thu a sawi bawk . Dr.Zarzoliana, Joint SPD chuan technical report a pe a, He Science building hi Rashtriya Uchchatar Shiksha Abhiyan (RUSA.2.0) sum atanga cheng nuai 156/- senga sak a ni.