Aizawl February 18, 2023: Zirtawpni khan ZPM Thalai Headquarters hruaitute chuan PAHOSS hmanga Aizawl khawpui hmun hrang hranga parking house sak chu ZPM Thalai Vice President Laltanpuia Zote hovin an tlawh a, parking house satute hian parking house an sa tha thawkhat niin ZPM Thalai hruaitute chuan an hria a, lawmawm an ti.

ZPM chuan tha an tih rualin, PAHOSS chu Aizawl khawpui chhunga traffic jam tih ziaawmna tura ruahman ni si, a tam zawkah chuan a sakna hmun leh vengin a zir lo an ti a, sum tam tak hmanna PAHOSS hmanga parking house sak tam zawk chuan Aizawl khawpui traffic tawt a chhawk zangkhai theih an ring lo. 

Thuchhuah an siama an tarlan danin PAHOSS sum dawng, hmang dik tawk lo an awma hremna mumal siam turin thuneitute an phut a, a nih loh chuan PAHOSS hi tute emaw induhsakna leh PAHOSS in a tum thelhin PAHOSS hi in sak tanpuina satliahah a chhuak ang tih an hlau a, dan mumal awm lo hnuaiah PAHOSS sum dawng, a nihna tur taka hmang lova la tipuitling lo te sawrkar hian ngawih bo pui mai a tum em ni? tih hi kan zawhna a ni, an ti.

ZPM Thalai hruaitute'n PAHOSS hmanga parking house sak mek leh sak zawh tawh an fanna ah hian, parking house sak mek, a then chu first installment dawnga a dang dawn chhunzawm ta lem lo an awm nual tih an hmu a, MNF sawrkâr term tawp dawn thlenga PAHOSS sum la dawng kim lo an awm chu sawifiah turin MNF sawrkâr kan phut a, ruahmanna felfai zawk neia kalpui turin Mizoram sawrkâr an ngen a ni.